Túrkistandaǵy kóshelerdi keńeıtip, jańa avtobýstar júrgizý qajet - Ómirzaq Shókeev
TÚRKІSTAN. QazAqparat - Túrkistan oblysynda aımaq basshysy Ómirzaq Shókeevtiń tóraǵalyǵymen apparattyq májilis ótip, óńirdegi birqatar mańyzdy máseleler qaraldy. Jıynda Túrkistan qalasynyń ákimi Álipbek Óserbaev qalanyń qurylysy, memleket qajettiligine qaıtarylatyn nysandar jáne ınfraqurylymdyq júıeler týraly baıandama jasady, dep habarlaıdy QazAqparat tilshisi.
Qala ákiminiń sózinshe, Túrkistannyń tazalyǵyn qamtamasyz etý maqsatynda negizgi 72 kóshe bıýdjet qarajaty esebinen tazalanyp kelse, bıyl tazalanatyn kósheler sany 122-ge kóbeıgen.
«Qala tazalyǵyn qamtamasyz etýge «Túrkistan-Jaryqtazalyq» mekemesinen 164 adam, 36 tehnıka jumyldyrylǵan. Kólik kozǵalysy jáne avtokólik joldaryn retteý arqyly qala tazalyǵyn qamtamasyz etýge tolyq múmkindigimiz bar. Aǵymdaǵy jyly bul maqsatta 62 shaqyrym jol ınfraqurylymyn damytý úshin 5 kóshe kúrdeli, al 27 kóshe ortasha jóndeýden ótti. Qala aýmaǵyn kógaldandyrý maqsatynda ótken jyldyń kúz aıynda 46 myń túp aǵash egildi», - dedi Álipbek Óserbaev.
Sondaı-aq, jıynda oblystyq qurylys basqarmasynyń basshysy Toqtar Úsipálıev Ákimshilik-iskerlik jáne rýhanı-mádenı ortalyqtardaǵy atqarylyp jatqan qurylys jumystarymen tanystyrdy. Baıandamalardy tyńdaǵan oblys ákimi Ómirzaq Shókeev tıisti basshylarǵa birqatar tapsyrmalar berdi.
«Túrkistan qalasynyń damýyn basty nazarda ustaǵanymyz jón. Saıabaqtardy sýlandyrý júıesin jolǵa qoıyp, qalanyń aınalasyn kógaldandyrýdy qolǵa alý qajet. Eski kanaldy jáne jerasty sýyn paıdalaný boıynsha arnaıy zertteý jasap, bir apta kóleminde naqty usynys berýdi tapsyramyn. Túrkistannyń jeri jaıly, munda kez-kelgen aǵash jaıqalyp ósedi. Sondyqtan da, qalany kórkeıtý, tazalyǵyn saqtaý - biz úshin basty orynda. Qala aınalasyndaǵy «jasyl beldeýdi» ulǵaıtyp, aǵashtardyń jańa túrin egýimiz kerek. Salynatyn nysandardyń barlyǵy derlik óziniń ortaǵasyrlyq kelbetin saqtaýy tıis. Qala kóshelerin keńeıtip, jaqsy, jańa avtobýstar júrgizý qajet», - dedi Ómirzaq Shókkev.
