Túrkistandaǵy kóptegen turǵyn úıler qyzyl syzyq pen jasyl aımaqqa salynǵan
TÚRKІSTAN. QazAqparat – Túrkistanda qalanyń bekitilgen Bas josparynda týyndaǵan ózekti máselelerdi talqylaý jıyny ótti. Basqosýda qalalyq sot pen oblystyq «Atameken» kásipkerler palatasy ókilderi, orta jáne shaǵyn bıznes kásipkerleri jer máselesi men ony zańdastyrýdaǵy qatysty ózekti problemalardy ortaǵa saldy, dep habarlaıdy QazAqparat tilshisi.
Shahar basshysy Rashıd Abatulynyń tóraǵalyǵymen ótken jıynda jekelegen turǵyndardan jer ýchaskelerin qaıtarý men bul baǵytta týyndaǵan máseleler barysy sóz boldy. Bas josparda Túrkistan qalasyn túrki áleminiń rýhanı ortalyǵy jáne Túrkistan oblysynyń jańa ákimshilik ortalyǵy retinde damytýdyń negizgi baǵyttary aıqyndalǵan.
Degenmen, qalalyq «Jer qatynastary bóliminiń» basshysy Narıman Qasymbekov pen «Sáýlet jáne qala qurylysy bóliminiń» basshysy Aıdos Kentýgaevtyń kóptegen turǵyn úılerdiń qyzyl syzyq pen jasyl aımaqqa túskenin atap ótti. Jasyl aımaq - saıabaqtar bolsa, qyzyl syzyq - keńeıtiletin joldar bolyp sanalady.
Aıdos Kentýgaev Túrkistan qalasyndaǵy turǵyn úılerdiń basym bóliginde qujattary rásimdelmegenin aıtady. Máselen, bıyl turǵyn úıler gazǵa ótý kezinde de birshama qolaısyzdyqtar týyndaǵan. Sebebi, kógildir otyn kezinde tehnıkalyq qujat (tehpasport) suraǵanda úıiniń zańdastyrylǵandyǵy nazarǵa alynady.
Al, bólim Bas josparǵa sáıkes jumys júrgizedi. Odan ózge, memleket muqtajdyǵyna alý kezinde de zańdastyrylǵan úılerdiń baǵasynda aıyrmashylyq bolady. Sol sebepti jyl basynan beri úı salar aldyn Túrkistan qalasy ákimdiginiń «Sáýlet jáne qala qurylysy bólimine arhıtektýralyq sáýlet josparynyń tapsyrmasyn alý qaǵıdaty júrgizilip keledi. Eskızdik jobasyn kelisken soń ǵana qurylys jumystary bastalady.
Rashıd Abatuly sala basshylaryna osy máselelerdiń keńinen halyq arasynda taralyp, turǵyndar jan-jaqty habardar bolýy úshin úgit-nasıhat jumystaryn jandandyrýǵa tapsyrma berdi.
