Túrkistandaǵy ındýstrıaldy aımaqta 14 joba júzege asyrylady
ShYMKENT. QazAqparat - Túrkistan qalasyndaǵy ındýstrıaldy aımaqta jobalyq quny 11 028,1 mln teńgeni quraıtyn 14 joba júzege asyrylady. Búgingi tańda 6 kásiporyn memlekettik qabyldaýdan ótken. Búgin bul týraly óńirlik kommýnıkatsııalar qyzmetinde ótken brıfıngte qala ákimi Tájibek Musaev aıtty, dep habarlaıdy QazAqparat tilshisi.
Kóne shahar ákiminiń aıtýynsha, kásiporyndardyń ashylýy nátıjesinde 240-qa jýyq jumys orny ashylǵan. Indýstrıaldy aımaqqa 1,3 mlrd teńge kóleminde ınvestıtsııa tartyldy. Sondaı-aq, óńirde túıe sútin óńdeıtin «Golden Camel Group LTD» birlesken qazaq-qytaı kásiporny aǵymdaǵy jyldyń tamyz aıynda iske qosylmaq. Kásiporyn túıe sútinen túrli ónimder jasap, 7 túrli energetıkalyq sýsyn shyǵarady dep josparlanyp otyr.
«Aǵymdaǵy jyldyń qańtar-naýryz aıynda ındýstrıaldy aımaqtaǵy kásiporyndardyń óndirgen ónim kólemi 343,3 mln teńgeni qurap, jalpy ónerkásip ónim kóleminde úlesi 7,9 paıyzǵa jetken. Aǵymdaǵy jyldyń 3 aıynda ónerkásip ónim kólemi 4 331,2 mln teńge bolyp otyr» ,- dedi Tájibek Qalmanuly.
Budan bólek, Údemeli ındýstrıaldy-ınnovatsııalyq damý baǵdarlamasy aıasynda 2010-2017 jyldary jalpy quny 3203 mlrd teńgeni quraıtyn 15 joba iske qosylyp, 753 jumys orny ashylǵan. Sondaı-aq, saýda-logıstıkalyq ortalyǵyn salýǵa jalpy alańy 20 gektar jer telimi bólinip, memlekettik akti alynypty. Ortalyqtyń qurylysyna 237 mln teńge qaralyp, onda jobalyq quny 4792 mln teńgeni quraıtyn 10 jobany ornalastyrý josparlanyp otyr.
