Túrkistandaǵy halyqaralyq týrızm ýnıversıteti stýdent qabyldaýǵa daıyn emes - senator

NUR-SULTAN. QazAqparat - Túrkistandaǵy Halyqaralyq týrızm jáne meımandostyq ýnıversıteti stýdentterdi qabyldaýǵa daıyn emes. Bul týraly QR Premer-Mınıstri Asqar Mamınge depýtattyq saýal joldaǵan senator Álimjan Qurtaev aıtty, dep habarlaıdy QazAqparat tilshisi.

«Bıyl QR Tuńǵysh Prezıdenti - Elbasy Nursultan Ábishuly Nazarbaevtyń bastamasymen jáne Memleket basshysy Qasym-Jomart Toqaevtyń tapsyrmasy negizinde Túrkistan qalasynda Halyqaralyq týrızm jáne meımandostyq ýnıversıteti ashyldy. Jańa ýnıversıtet Qazaqstan Respýblıkasynda týrıstik qyzmetti damytýdyń memlekettik baǵdarlamasy aıasynda quryldy. Túrkistan qalasy - tegi bir, tarıhy ortaq túrki elderiniń túp qazyǵy. Búginde Túrkistan ısi musylman elderi úshin ǵana emes, dúnıejúzi halqy úshin de qadirli mekenge aınalǵan. Jyl saıyn álemniń túkpir-túkpirinen 1 mln astam adam keledi, 2025 jyly Túrkistan óńirine 5 mln jýyq týrıst keledi dep josparlanýda. Týrızmdi damytyp, saıahatshylarǵa sapaly qyzmet kórsetý maqsatynda, Týrızm jáne qonaqjaılylyq salasyndaǵy mamandardy daıarlaý úshin Qazaqstandaǵy halyqaralyq deńgeıdegi alǵashqy mamandandyrylǵan ýnıversıtetti ashýdyń mańyzyn atap ótken jón», - dedi senator.

Onyń aıtýynsha, ýnıversıtet túlekteri halyqaralyq standarttyń qos dıplomyn - qazaqstandyq jáne sheteldik seriktes ýnıversıtetten alady.

«Túrkistan qalasyndaǵy jańa Halyqaralyq týrızm ýnıversıteti bıyldan bastap talapkerlerdi qabyldady. 2020-2021 jylǵy oqý jylyna 800 grant bólingen. Alǵashqy 588 stýdent 6 bilim baǵdarlamasy boıynsha oqýdy bastady. Koronavırýs pandemııasy is júzinde úlken janjaldan qutqardy deýge bolady. Sebebi atalǵan stýdentter onlaın rejımde oqyp jatyr. Bizdi tań qaldyrǵan jaǵdaı - osy ýaqytqa deıin atalǵan ýnıversıtet ǵımarattaryn jabdyqtaýǵa bıýdjet qarajatyn bólý máselesi sheshilmegendigi bolyp otyr», - dedi ol.

Senator dereginshe, Túrkistan oblysynyń ákimdigi 4 ǵımarat bólgen. Onyń ekeýi - jańa bolsa, ekeýi - jóndeýden ótken burynǵy ǵımarattar. Búgingi tańda ǵımarattar qańyrap bos tur.

«Bilim mınıstrliginiń boljamyna sáıkes, kelesi oqý kezeńinde stýdentter oqý ornyna baryp, dástúrli formatta oqıdy. Biraq Halyqaralyq týrızm jáne meımandostyq ýnıversıteti stýdentteri bul jaǵdaıda qalaı oqymaq?», - degen Álimjan Qurtaev Úkimet basshysynan osy máseleni sheshý úshin qarajat bólýdi surady.