Túrkistandaǵy fabrıka erler men áıelderge brendti kostıýmder tigetin bolady
TÚRKІSTAN. QazAqparat – Túrkistan qalasynyń ındýstrııalyq aımaǵynda ornalasqan «Turkistan Textile» tigin fabrıkasynyń jumysy búginde jandana túsken. Qazaqstan men Ózbekstannyń birlesken kásipornynyń qurylysy rekordtyq merzimde aıaqtalyp otyr, dep habarlaıdy QazAqparat tilshisi.
Jylyna 15 myń dana toqyma ónimin shyǵarýǵa qaýqarly kásiporyn tolyq iske qosylǵanda 1 myńǵa jýyq jumys orny ashylatyn bolady. Tigin fabrıkasy saltanatty túrde QR Premer-Mınıstri Asqar Mamın men ÓR Premer-Mınıstri Abdýlla Arıpovtiń qatysýymen ashylǵan edi. Búginde kásiporyn óz ónimin óndirýge kiristi.
Investor qyzmetkerlerdi jaldaý kezinde múmkindigi shekteýli áıelder men az qamtylǵan otbasylardan shyqqan adamdarǵa jumys oryndaryn usynýǵa basa nazar aýdarýǵa nıetti. Sonymen qatar, Túrkistan joǵary kópsalaly qolóner kolledjiniń stýdentterine praktıkalyq daǵdylardy ıgerýge múmkindik beriledi. Baýyrlas memleketterdiń arasyndaǵy yntymaqtastyqty keńeıtý aıasynda iske asyrylǵan jobanyń bastamashysy – «Qojakent Textile» JShS kompanııasy. Kásiporyn jyl saıyn 15 000 birlikke deıin toqyma ónimin óndirýdi josparlap otyr. Tigin fabrıkasy túrli arnaıy kıimder (medıtsınalyq halattar, arnaıy formalar) men syrtqy kıimderdi, «Ataman jáne Ramsay» brendterimen erlerge jáne áıelderge arnalǵan kostıýmderdi shyǵarýdy jolǵa qoımaq. Jalpy zaýytqa tartylǵan ınvestıtsııa somasy shamamen 420 mln teńgeni quraıdy.
