Túrkistandaǵy evakýatsııalyq pýnktterde 24 myń adam tirkeldi
Arys qalasynyń mańyndaǵy shtabta ótken brıfıngke Túrkistan oblysy ákiminiń orynbasary Joldymurat Amanbaev pen oblys ákiminiń keńesshisi Ulasbek Sádibekov, sondaı-aq Shymkent qalasynyń ákiminiń orynbasary Qaırat Nurtaı jaǵdaıdy baıandady.
Shtab músheleriniń sózine qaraǵanda, Arys qalasynda bolǵan tótenshe jaǵdaıǵa baılanysty zardap shekken azamattarmen tolyqqandy jumys júrgizilýde. Evakýatsııalyq pýnktterde 24 myńnan astam adam tirkelgen bolsa, olardyń 20 myńǵa jýyǵy Shymkent qalasyna ornalastyrylǵan. 4 myńnan astam adam Túrkistan oblysynyń aýdandarynda tıisti kómek alýda. Budan bólek, Arys qalasyndaǵy tótenshe jaǵdaıǵa baılanysty Túrkistan oblysy men Shymkent qalasynda 70-ke jýyq qonystaný ortalyqtary jumys isteýde. Halyq ornalasqan orta mektep, kolledj, balabaqsha, mektep-ınternattarda evakýatsııalanǵan azamattarǵa barlyq qajetti jaǵdaılar jasalǵan.
Túrkistan oblysy ákiminiń orynbasary Joldymurat Amanbaev kúni keshe Túrkistan oblysynda «Túrkistan» korporatıvtik áleýmettik damý qorynda arnaıy esep-shot ashylǵanyn habarlady.
«Úsh kúnnen beri atalǵan qorǵa respýblıkamyzdyń túkpir-túkpirinen qazaqstandyqtar qarjylaryn aýdaryp jatyr. 26 maýsymdaǵy málimet boıynsha qorǵa túsken qarjy kólemi 225 mln teńgege jetti»,- dedi Joldymurat Amanbaev.
Al, halyqty apat bolǵan aımaqtan kóshirý kezinde 200-ge jýyq bala ata-anasynan adasyp qalǵan bolatyn. Olardyń barlyǵy da búgingi kúni otbasymen qaýyshqan.
«Qazirgi ýaqytta bul baǵytta aryz-shaǵym túsip jatqan joq. Sondyqtan da, ata-anasynan, otbasynan adasyp qalǵan balalar joq dep aıta alamyz. Óńirdiń kásipkerleri tótenshe jaǵdaıdan zardap shekkenderge aqshalaı jáne zattaı kómek kórsetýge ázir ekenderin aıtýda, ári is-júzinde bastapta jiberdi. Odan bólek, qabyldaý pýnkterine kelgen jandardy ystyq tamaqpen, kıim keshekpen qamtý, balalaryna oıynshyqtar alyp berý jáne ózge de kúndelikti tutyný taýarlarymen qamtý isterine jergilikti kásipkerler men eriktiler óz úlesterin qosýda», - dedi oblys ákiminiń keńesshisi Ulasbek Sádibekuly.
