Túrkistandaǵy bas shyrshanyń shamy jaǵyldy
TÚRKІSTAN. QazAqparat- Túrkistan qalasyndaǵy ákimshilik-iskerlik ortalyǵynda ornalasqan bas shyrshanyń shamy jaǵyldy, dep habarlaıdy QazAqparat tilshisi.18 metrlik shyrsha 500-deı oıynshyq pen jaryqshammen kórkemdelip, ulttyq naqyshtaǵy oıý-órnektermen bezendirilgen.
Balalarǵa shattyq syılaǵan merekelik is-sharada Túrkistan oblysynyń ákimi Ómirzaq Shókeev bas shyrshanyń shamyn jaǵyp, búldirshinderdiń qýanyshymen bólisti.
Ertegi keıipkerleri men aıaz ata qarshaqyzben birge balaqaılarǵa kóterińki kóńil-kúı syılap, birge bıledi. Talantty ánshi Aızada Álimbek «Jańa jyl» ánin shyrqap, balalardyń án toby da óner kórsetip, merekeni ásem ánmen órnektedi. Kesh kópshilikti balalyq shaqqa jetelep, ádemi áser syılady. Balaqaılarǵa syılyqtar taratyldy.
Shyrsha demeýshiler esebinen ornatylǵan. Sondaı-aq Túrkistandaǵy mádenı-rýhanı ortalyq pen «Jeńis» saıabaǵynda da shyrsha ornatylyp, olar kóz tartatyn ásem oıynshyqtarmen bezendirildi.
