Túrkistandaǵy «Áziret Sultan» mýzeıinde erekshe kórme ashyldy
Mýzeıge qarasty Qoja Ahmet ıAsaýı kesenesiniń «Kitaphana» bólmesinde «Tulpar sulý kóriner ábzelimen» kórmesi qoıyldy, dep habarlaıdy QazAqparat HAA tilshisi.
Atalmysh kórmege elimizdiń on tórt oblysynan jáne Almaty men Astana qalalarynan Halyqaralyq «ıAsaýıtaný» baıqaýyna qatysýshy oqýshylar men ustazdar, qala turǵyndary men qonaqtar jáne mýzeı qyzmetkerleri qatysty.
Ótkendi eskermeı erteńniń joqtyǵyn «Bolashaqqa baǵdar: rýhanı jańǵyrý» maqalasynda basa aıtqan Elbasynyń sózin basshylyqqa alǵan kórme uıymdastyrýshylary mýzeı qorynda saqtalǵan halqymyzdyń baı tarıhy jaıly baıandaıtyn, kózdiń jaýyn alatyn jádigerlerdi kópshilik qaýymǵa tanystyrdy. Baı murany keńinen nasıhattaýdy maqsat tutty. Ekspozıtsııaǵa qoıylǵan at ábzelderi týrıster men kelýshiler nazaryna tuńǵysh ret usynyldy. Babalarymyzdyń turmysynan syr shertetin kóne buıymdar arasynda qorymdarynan tabylǵan zattar da bar. At ábzelderiniń san túri qola men súıekten jasalǵany qazaq halqynyń sol tustaǵy turmysy jylqy malymen baılanysyp jatqanyn kórsetedi. Arheologııalyq biregeı buıymdar qalpyna keltirilmeı, kórmege sol kúıi qoıylǵan.
