Túrkistandaǵy aýrýhanalarda oryn jetispeýshiligi týraly qaýeset shyndyqqa janaspaıdy – oblystyń bas dárigeri
TÚRKІSTAN. QazAqparat – Túrkistan qalalyq ortalyq aýrýhanasyna tumaýdyń belgilerimen dárigerlik kómekke kelgen azamattar qatary kóbeıgen. Bul týraly búgin Óńirlik kommýnıkatsııalar qyzmetinde ótken brıfıngte oblystyq qoǵamdyq densaýlyq basqarmasynyń basshysy Marat Pashımov málimdedi, dep habarlaıdy QazAqparat tilshisi.
Marat Pashımovtyń aıtýynsha, qalalyq aýrýhanaǵa kelgen naýqastarda dene qyzýynyń kóterilýi men jótel jáne álsizdik baıqalǵan. Medıtsınalyq tekserý nátıjesinde naýqastardan pnevmonııa, ıaǵnı ókpeniń qabynýy anyqtalǵan. Degenmen olardan alynǵan sanamalardyń qortyndysy koronavırýs ınfektsııasyna teris nátıje kórsetken.
«Aýrýhanaǵa túsken azamattardan shuǵyl túrde Covid-19 ınfektsııasyna taldama alynady. Taldama anyqtalǵanǵa deıin olar provızorlyq bólimde em qabyldap, teris nátıjesi shyqqandary aýrýhana bólimderine jatqyzylady. Statıstıka boıynsha qazirgi tańda Túrkistan oblysy boıynsha aýrýhanalarda 303 naýqas pnevmonııadan em qabyldaýda. Jalpy, 87 azamat jazylyp shyqqan. Sondaı-aq, Túrkistandaǵy aýrýhanalarda oryn jetispeýshiligi týraly qaýeset shyndyqqa janaspaıdy. Aýrýhanalarda naýqastarǵa tósek-oryn jetkilikti. Kentaý qalalyq ortalyq aýrýhanasynda 50 oryndyq somatıkalyq bólimshe qaıta daıarlandy. Túrkistan qalalyq ortalyq aýrýhanasynda da qosymsha 30 tósek-oryn ázirlengen. Oryn alǵan jaǵdaıǵa baılanysty naýqastardy josparly jatqyzýlarǵa shekteý qoıylǵan. Jeke klınıkalar da ózderine bekitilgen turǵyndarǵa tıisti medıtsınalyq qyzmet kórsetedi», - dedi basqarma basshysy.
Sondaı-aq, oblystyń bas dárigeri barsha turǵyndardan qarantın rejımin qadaǵalap, ınfektsııasynyń taralýyna jol bermeýge shaqyrady. Medıtsınalyq betperde taǵyp, antıseptıkalyq zattardy únemi qoldanýǵa jáne eki metr qashyqtyqty saqtaı otyryp, qaýipsizdik sharalaryn qadaǵalaýdy eskertti.
