Túrkistandaǵy atyshýly psıhodıspanserde órt shyqty
ShYMKENT. QazAqparat - Túrkistandaǵy psıhonevrologııalyq dıspanserde órt shyqty. Emdeý mekemesiniń tún jarymda otqa oranǵanyn jergilikti turǵyndar túsirip alypty. Óńirdiń tótenshe jaǵdaılar qyzmeti ortalyqtyń qoımasy janǵanyn málimdedi, dep habarlaıdy QazAqparat HAA tilshisi.
Uıaly telefondaǵy beınetúsirilimde mekemeniń bir qabatty ǵımaraty órtenip jatqany kórinip tur. Artqy jaǵynda emdeý ortalyǵynyń eki qabatty ǵımaraty túsirilgen. Sondaı-aq órt sóndirý kólikteriniń daýysy estiledi.
Oblystyq TJD baspasóz qyzmetiniń málimetinshe jalyn dıspanserdiń negizgi ǵımaratyna ótpegen. Sondyqtan naýqastar eshqaıda kóshirilmepti. Tek 200 sharshy metrdi quraıtyn qoıma bóligi otqa oranǵan.
«Bizge keshe keshkisin 20.05 shamasynda Túrkistan qalasyndaǵy emdeý mekemesinde órt shyqqany týraly habar kelip tústi. Oqıǵa ornyna 20 sóndirýshi men 3 arnaıy tehnıka jumyldyryldy. Olar qoımadaǵy aǵashtar men esikterdi, qurylys qoqystaryn jáne shatyrdaǵy otty óshirgen. Jalyn 21.55-ter shamasynda tolyqtaı aýyzdyqtaldy. Tilsiz jaýdan zardap shekkender joq»,-deıdi oblystyq TJD bas mamany Zarıpa Turysbekova.
