Túrkistandaǵy ákimshilik-iskerlik ortalyǵynda qurylys jumysy qalypty júrip jatyr
TÚRKІSTAN. QazAqparat – Túrkistan oblysynyń ákimi Ómirzaq Shókeev birqatar áleýmettik ınfraqurylymdyq jobalardyń júzege asý barysyn baqylady. Oblys ortalyǵyndaǵy qurylys alańdaryn aralap, ár nysannyń sapaly ári tıisti arhıtektýralyq talapqa saı salý qajettigin qadap aıtty, dep habarlaıdy QazAqparat tilshisi.
Aımaq basshysy barlyq qurylys alańdarynda koronavýrıs indetine qarsy saqtyq sharalary uıymdastyrylyp, tıisti jumystar óz deńgeıinde júrgizilýin tapsyrdy.
Aıta keteıik, ákimshilik-iskerlik ortalyǵynda memlekettik bıýdjet esebinen kredıttik 5489 páterli 88 turǵyn úıdiń qurylysy júrgizilýde. 24 úıge jýyrda turǵyndar qonystanady dep josparlanǵan. Budan bólek, jeke salymshylar tarapynan salynyp jatqan 37 úıdiń 31-i jyl sońyna deıin tapsyrylmaq.
«Túrkistan qalasynda júrip jatqan jańa qurylystar únemi nazarda bolady. Kópqabatty turǵyn úılerdiń qurylysy da toqtamaıdy. Barlyq jumystar belgilengen kestege sáıkes júrgizilip jatyr. Árıne, álem jurtshylyǵyn ábigerge salǵan koronavırýs indetiniń kedergi keltirgen tustary joq emes. Degenmen, másele sheshilýde. Qurylys zattarymen qamtamasyz etý jaǵy da retke keltirildi»,-dedi Ómirzaq Shókeev.
Oblys ákimi Túrkistan qalasyn abattandyrý jumystaryn da baqylap, kóshet otyrǵyzylǵan kóshelerdi jaıaý aralap shyqty. Jańadan júzege asatyn dendrobaq aýmaǵynda boldy. Baý-baqsha ósirilgen erekshe saıabaq oblys ortalyǵynyń irgesinde ornalaspaq. Gúlge oranǵan jasyl aýmaqta jemis aǵashtary men júzdegen ósimdik túrleri ósiriledi. 28 gektar alqapty alyp jatqan jańa demalys ornynda eń aldymen sýarý júıeleri júzege asyrylady. Dendrobaq jasyl jelekke oranyp, jasandy kól paıda bolady.
