Túrkistandaǵy 17 tarıhı-mádenı nysandy jańǵyrtýǵa sheteldik ǵalymdar tartyldy
TÚRKІSTAN. QazAqparat – Túrkistandaǵy 17 tarıhı-mádenı nysandy qaıta jańǵyrtý jumystaryna sheteldik ǵalymdar da tartylýda. Bul týraly elimizdiń Mádenıet jáne sport mınıstrliginiń departament basshysy Kúmis Seıitova málim etti, dep habarlaıdy QazAqparat tilshisi.
Mádenıet jáne óner isteri departamenti basshysynyń aıtýynsha, aǵymdaǵy jyly elimizdegi 240 respýblıkalyq jáne halyqaralyq deńgeıdegi eskertkishtiń 47-sinde jańartý jumystary júrgizilip jatyr. Sonyń ishinde Túrkistan qalasynda 17 tarıhı-mádenı nysanda qaıta jańǵyrtý jáne arheologııalyq jumystar qolǵa alynǵan. Bul jumystardy atqarý úsh jylǵa josparlanyp, 2019-2021 jyldarǵa bólingen.
«Qoja Ahmet ıAsaýı keseneniń kúmbezinde, Rábııa Sultan begim men segiz qyrly kesenelerde, shyǵys monshasy sııaqty birqatar nysandarda qaıta jańǵyrtý jumystary júrgizilýde. Sondaı-aq, han ordasy men han meshiti ornalasqan Jeti ata qaqpasy men keseneni jalǵaıtyn magıstraldy kóshede jáne Kúltóbe qalashyǵynda arheologııalyq qazba jumystary júrip jatyr. Bul jumystarǵa qarjy tek memlekettiń bıýdjetinen ǵana emes, demeýshiler esebinen de qarastyrylyp otyr. Máselen, Kúltóbe qalashyǵynda demeýshilerdiń qoldaý kórsetýimen 9 ga jerde qazba júrgizilse, bıyl sol jerden tabylǵan eskertkishterdi saqtap qalý men qorǵaý ıaǵnı konservatsııalaý, restavratsııalaý qolǵa alyndy. Qalpyna keltirý jumystaryna Qazaqstannan ǵana emes, sheteldik ǵalymdar da tartylýda. Keseneni búldirip almaı saqtap qalý úshin ár jumysty ǵylymı-ádistemelik keńestiń aldyna qoıamyz jáne ǵalymdarmen de keńesip otyramyz»,- dedi Kúmis Seıitova.
Aıta keteıik, bıyl Túrkistan oblysyndaǵy taǵy bir úlken jańalyq 88 ga aýmaqqa abattandyrý jumystary júrgizilip jatqany bolyp otyr. Bul jumystardy ázirge Túrkistan qalasy ákimdigi atqarýda.
