Túrkistanda jylyna 33 myń tonna qymyz ben shubat óńdeıtin zaýyttyń irgetasy qalandy
ASTANA. QazAqparat - Ońtústik Qazaqstan oblysy Túrkistan qalasynda qymyz ben shubat óńdeý zaýytynyń irgetasy qalandy. Bul joba Elbasynyń «100 naqty qadam» Ult josparynyń 60-shy qadamynda sút jáne sút ónimderi óndirisin damytý úshin strategııalyq ınvestorlar tartý mindetin iske asyrý aıasynda qolǵa alynyp otyr, dep habarlaıdy oblystyq ákimdiktiń baspasóz qyzmeti.
Óńirdegi sútti daıyndaý jóninde aýyl sharýashylyq kooperatsııany damytýǵa serpin beretin zaýyttyń jalpy quny 7 mlrd. 456,5 mln. teńgeni quraıdy. Zaýyt tolyq qýattylyǵyna engende táýligine 100 tonna túıe jáne jylqy sútin qaıta óńdep, osy ónimniń untaǵyn shyǵarady. Óndiris ornynyń jylyna 33 myń tonna sútti óńdeýge múmkindigi bar. Joba boıynsha alǵashqy kezeńde 170 adam jumyspen qamtylmaq.
Ult josparynda sonymen qatar, «úsh jyl merzimde TMD elderi naryǵyna shyǵarylatyn ónimderiniń jartysyna deıingi eksportyn qamtamasyz etý» jaıy aıtylǵan.
Ońtústik Qazaqstan oblysynyń ákimi Janseıit Túımebaev taıaýda atalǵan jobaǵa qarjy salatyn «Golden Cemal Group LTD»kompanııasynyń quryltaıshysy ıAng Tsımen kezdesip, mańyzdy jospardy talqyǵa saldy. Investorlarmen kelisimge júrgizip, óndiretin ónimderi úlken suranysqa ıe bola alatyn zaýyttyń qurylysyn bastaý jóninde ortaq sheshimge keldi. Jergilikti atqarýshy organ tarapynan kásiporynǵa 5,5 ga. jer telimi bólinip, memleket esebinen ınfraqurylymyn jetkizý josparlanǵan. Aldaǵy ýaqytta kompanııa basshylyǵy osynda túıe jáne jylqy sharýashylyǵymen aınalysýdy da kózdep otyr.
