Túrkistanda jyl sońyna deıin 610 turǵyn jańa páterge ıe bolady

TÚRKІSTAN. QazAqparat – Jyl sońyna deıin baspana kezeginde turǵan jalpy 610 túrkistandyqqa páter kiltteri beriledi - dep habarlaıdy QazAqparat tilshisi.

Olardyń barlyǵy – kópbalaly jáne turmysy tómen otbasylar. Onyń ishinde 470 kópbalaly otbasy men 140 álsiz toptaǵy azamattar qonys toıyn toılaıdy.

Sondaı-aq, Túrkistan qalasyndaǵy ákimshilik-iskerlik ortalyǵy aýmaǵyndaǵy 14 kópqabatty turǵyn úıdiń 800-ge jýyq páteri «Otbasy bank» AQ arqyly jáne kópqabatty 3 turǵyn úıdiń 200-ge jýyq páteri «7-20-25» baǵdarlamasy arqyly nesıe júıesimen satylymǵa qoıyldy.

Búginde munda bıýdjet esebinen 7, 9 jáne 12 qabatty 67 turǵyn úıdiń qurylysy júrip jatyr. Talapqa saı jańa úılerdiń aýlalary abattandyrylyp, balalar alańqaılary salynǵan.

Túrkistan qalasynda qoldanysqa beriletin kópqabatty turǵyn úılerdiń ınfraqurylymy tolyqtaı iske qosylǵan. Páterler de talapqa saı árlengen.