Túrkistanda jyl sońyna deıin 16 kópqabatty úıdiń qurylysy aıaqtalady
TÚRKІSTAN. QazAqparat - «Túrkistan» áleýmettik kásipkerlik korporatsııasy» AQ men Óńirlik kommýnıkatsııalar qyzmeti birlesip Túrkistan qalasynda press-týr uıymdastyrdy.
Shara barysynda jýrnalıster agroónerkásiptik, týrızm, qurylys salalaryna qatysty birqatar nysandarda bolyp, atqarylyp jatqan jumystarmen tanysty, dep habarlaıdy QazAqparat tilshisi Túrkistan oblysynyń Óńirlik kommýnıkatsııalar qyzmetine silteme jasap.
Aldymen BAQ ókilderi aýyl sharýashylyǵy salasyndaǵy jańbyrlatyp sýarý júıesiniń jobalarymen tanysty. Qazirgi tańda, myń gektardan astam alqapta jańbyrlatyp sýarý júıesin qurý qolǵa alynýda. Mundaǵy maqsat jańasha jobanyń kómegimen dándi-daqyldardyń ónim kólemin arttyrý. Búginde jospardy júzege asyrý úshin 100 fermerlik sharýashylyq jer telimderi biriktirilgen. Sondaı-aq, jańbyrlatyp sýarý júıesine qoldanylatyn Amerıkandyq «T-L» fırmasynyń 18 jańbyrlatyp sýarý mashınasy ornatylyp, 26 aýyl sharýashylyǵy tehnıkasy bar mashına-traktor stansasy qurylǵan.
Sondaı-aq, tilshiler áleýmettik dúkenderdiń jaı-kúıine de qanyqty. Jalpy Túrkistan qalasynda áleýmettik mańyzy bar azyq-túlik taýarlarynyń baǵasyn retteý maqsatynda 13 dúken jumys istese, 5 sýpermarkette áleýmettik taýarlar jıyntyǵynyń qatary bar. Onda áleýmettik mańyzy bar azyq-túlikter tizimine kiretin 19 túrli taýarlar bazar narqynan 10 paıyzǵa deıin tómen baǵada saýdalanady. Saýda oryndaryn úzdiksiz tıisti azyq-túlikpen qamtyp otyrý úshin arnaıy qor qurylǵan. Qazirgi tańda, onda jalpy quny 533,5 mln. teńge bolatyn 6 581,8 tonna taýar saqtalǵan.
Sonymen qatar, jýrnalıster qaýymy «Turkistan Jana-qala» jańa turǵyn úı alqabynda da bolyp, jańadan boı kótergen kópqabatty turǵyn úılerdi aralap kórdi.
Budan bólek, Túrkistan qalasynda «Arman» jáne «Syrdarııa» turǵyn úı keshenderi jobalary da júzege asyrylǵan. Nátıjesinde 1 418 páterlik 44 kópqabatty turǵyn salynyp, ótken jyly 165 páter satyldy. Al, ústimizdegi jyldyń sońyna deıin jalpy aýdany 32 864,02 sharshy metr bolatyn 488 páterlik 16 úıdiń qurylysyn aıaqtaý josparlanyp otyr.
BAQ ókilderi aıaldaǵan sońǵy nysan N.Nazarbaev dańǵylyndaǵy aqparattyq-mýltımedııalyq ınfraqurylymdy damytýǵa baǵyttalǵan joba boldy. Onda qalanyń týrızm salasyndaǵy jańalyqtar jáne týrısterge qajetti aqparattardy nasıhattaýǵa arnalǵan LED ekran qoıylǵan.
Aıta keteıik, 2021 jyldyń sońyna deıin taǵy 215 jarnamalyq qurylym ornatý josparlanýda. Búgingi kúni seriktes-ınvestordyń esebinen jalpy somasy 400 mln. teńgeden astam 34 jarnamalyq qurylym ornatylyp, jobanyń birinshi kezeńi aıaqtaldy.
Sondaı-aq, munda «Turkistan Bike» avtomattandyrylǵan veloprokat jobasy júzege asyrylǵan. Bul joba aıasynda qala boıynsha 40 velosıpedi bar 5 velobeket ornatylǵan. Jobanyń pılottyq iske qosylýy sátti ótti jáne qazirgi ýaqytta jergilikti turǵyndar arasynda, sonymen qatar, qala qonaqtary arasynda da úlken suranysqa ıe.
Press-týrdan soń oblys ákiminiń orynbasary S.Qalqamanov jáne «Túrkistan» ÁKK» AQ Basqarma tóraıymy Aıgúl Ahmedjanovanyń qatysýymen brıfıng uıymdastyryldy. Jıyn barysynda A.Ahmedjanova baıandama jasap, jýrnalısterdiń saýaldaryna jaýap berdi.
