Túrkistanda jýrnalıster arasynda týrnır ótti
El táýelsizdiginiń 30 jyldyǵy men Túrkistan oblysynyń 3 jyldyǵy aıasynda bastaý alǵan sporttyq sharada oblys ákiminiń orynbasary Sáken Qalqamanov sóz alyp, BAQ ókilderine sáttilik tiledi.
«El Táýelsizdiginiń 30 jyldyǵy men Túrkistan oblysynyń 3 jyldyǵy aıasynda kásibı merekelerińizge oraı ótkizilip otyrǵan búgingi týrnır tabysty aıaqtaldy dep oılaımyn. Búgingideı aqparat salasynyń mańyzdylyǵy artqan ýaqytta Sizder halyqqa shynaıy ári jedel habar taratý jolynda jan aıamaı eńbektenip kelesizder. Qoǵamnyń tynyshtyǵy men turaqtylyǵy tikeleı Sizderdiń jumystaryńyzdyń nátıjesinde qalyptasady. Túrkistan oblysynyń barlyq baǵyttaǵy damýyna qosqan eleýli úlesterińiz úshin shynaıy alǵysymdy bildiremin. Ózara áriptestik baılanysty nyǵaıtyp, salaýatty ómir saltyn saqtaýǵa baǵyttalǵan búgingi sharanyń mańyzy erekshe. Sizder búgin aqparat salasynda ǵana emes, sportta da kásibı biliktilikterińizdi tanyta bildińizder.Barsha jeńimpaz atanǵan komandalardy jeńisterimen quttyqtaımyn! Aldaǵy ýaqyttaǵy barlyq bastamalaryńyzǵa sáttilik, eńbekterińizge jemis tileımin!», – dedi ol.
Jýrnalıster arasynda dostyq pen əriptestikti tý etken dástúrli spartakıadaǵa oblystyq qoǵamdyq damý basqarmasynyń basshysy Damır Júnisov, oblystyq dene shynyqtyrý jáne sport basqarmasynyń basshysy Qanat Joldyqaraev, Qazaqstan Jýrnalıster odaǵy Túrkistan oblystyq fılıalynyń tóraǵasy Ǵalymjan Elshibaı qatysty.
Jarysta «Túrkistan» telearnasy men «Reıtıng – Sobkor» komandasy, «Otyrar» telearnasy men «Túrkistan BAQ», «Ońtústik Qazaqstan» gazeti men «Shamshyraq» gazeti,«Nar tv» men «Ońtústik» telearnalarynyń komandalary voleıbol, arqan tartys, shahmat syndy sport túrlerinen dodaǵa tústi.
Jalpy komandalyq esepte birinshi oryndy «Reıtıng – Sobkor» komandasy, ekinshi oryndy «Ońtústik» telearnasynyń komandasy, al úshinshi oryndy «Túrkistan» telearnasynyń tilshileri ıelendi.
