Túrkistanda jýrnalıst Beısen Quranbek jaıly kitap tanystyryldy
TÚRKІSTAN. QazAqparat – Túrkistan qalasynda qazaq televızııasynyń tarlany, jýrnalıst Beısen Quranbek týraly estelikter jınaǵy kitabynyń tanystyrylymy ótti. Jetisý óńirinen túrki áleminiń besigi Túrkistan shaharyna jetken «Bizdiń Beısen» kitaby óńirdegi barlyq kitaphanalardyń tórinen oryn almaq, dep habarlaıdy QazAqparat tilshisi.
Ahmet ıAsaýı atyndaǵy halyqaralyq qazaq-túrik ýnıversıtetiniń ǵylymı kitaphanasynda ótken rýhanı jıynǵa ýnıversıtettiń jýrnalıstıka kafedrasynyń belsendi jastary qatysty.
Elbasy Nursultan Nazarbaev pen QR Prezıdenti Qasym-Jomart Toqaevtyń kóńil aıtýynan bastalǵan jınaqta tanymal el aǵalarynyń esteligi men zamandastarynyń tolǵanystary, aqyndardyń arnaý jyrlary men qarapaıyp kórermenderdiń ystyq yqylasy, saǵynyshy toptastyrylǵan. Qarapaıymdylyǵymen qalyń qazaqtyń esinde qalǵan qoǵam qaıratkerine arnalǵan týyndynyń tusaýkeseri dara tulǵanyń Túrkistan oblysyndaǵy áriptes, dos, zamandastarynyń basyn qosty.
Olar halqynyń janyna jalaý bolǵan azamattyń bolmysyn tanytatyn oqıǵalardy eske alyp, áserli estelikterdi aıtty.
Erkin formatta ótken kezdesýde Beısen Quranbektiń kýrstasy, QR Jýrnalıster odaǵynyń Túrkistan oblystyq fılıalynyń tóraǵasy Ǵalymjan Elshibaı sóz sóıledi. Oqý ordasynyń jýrnalıstıka mamandyǵy boıynsha bilim alyp jatqan stýdentterine Beısen Quranbek atyndaǵy 3 stıpendııa taǵaıyndalatynyn jetkizdi.
Kezdesý sońynda jańa kitap ýnıversıtet kitaphanasyna jáne jýrnalıstıka kafedrasyna syıǵa tapsyryldy.
Jınaq qazaq eliniń birtýar perzenti, telejýrnalıstıka tarlany – Beısen Quranbekti qurmetpen eske alýshy qalyń kópshilikke arnalǵan.
