Túrkistanda juqpaly aýrýlar gospıtali ashylady
TÚRKІSTAN. Túrkistanda modýldik juqpaly aýrýlar gospıtaliniń qurylysy aıaqtalýǵa jaqyn, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Memleket basshysynyń koronavırýsqa qarsy sharalardy kúsheıtýge qatysty bergen tapsyrmasymen boı kótergen jańa ortalyq zamanaýı tehnıkamen tolyq jabdyqtalǵan.
Koronavırýs ınfektsııasyn juqtyrǵandardy oqshaýlap, sapaly medıtsınalyq qyzmet kórsetetin ortalyq 60 kúnde salyndy. Jeti myń sharshy metr aýmaqqa ornalasqan ınfektsııalyq gospıtal 200 orynǵa laıyqtalǵan. Ár tósek - orynǵa jasandy tynys alý qondyrǵysy ornatylǵan. Medıtsınalyq qural-jabdyqtyń bári qamtylǵan. Jansaqtaý bólimi, zerthanasy bar. Naýqastar dárigerdi shaqyra alatyn arnaıy qondyrǵy ornatylǵan. Emdelýshilerdiń densaýlyǵyn arnaıy bilezikter arqyly baqylaýǵa bolady. Aýrýhanada kontaktisiz baqylaý júıesi iske qosylady.
Oblys ákimi Ómirzaq Shókeev Túrkistandaǵy birqatar strategııalyq mańyzdy qurylys alańdarynda boldy. Merdigerlermen kezdesip, qurylysty kestege sáıkes aıaqtaýdy mindettep, sapaǵa basty nazar aýdarýdy eskertti.
Qurylysy júrip jatqan 8 qabatty keshendi emdeý ortalyǵynyń jalpy aýmaǵy 100 myń sharshy metrge jýyq. Bıyl shilde aıynda bastalǵan qurylystyń aıaqtalý merzimi – 2022 jyl jeltoqsan aıy. 630 oryndyq kópsalaly aýrýhananyń qurylysy memlekettik jekemenshik áriptestik baǵdarlamasy sheńberinde júzege asyrylýda. «Sembol construction» túrik kompanııasynyń qarjylandyrýymen salynyp jatqan keshendi emdeý ortalyǵy keler jyly paıdalanýǵa beriledi dep josparlanǵan. Jalpy aýmaǵy 16 gektar jerdi alatyn kópsalaly aýrýhanada dıagnostıkalyq keńes kórsetýden bastap barlyq salada kómek kórsetetin bólimder jumys isteıdi. Ortalyq tolyqtaı zamanaýı medıtsınalyq qural-jabdyqtarmen qamtamasyz etilmek.
