Túrkistanda jolaqy qymbattaýy múmkin
TÚRKІSTAN. QazAqparat –Túrkistanda qoǵamdyq kólikpen júrý aqysy jańa jyldan bastap 50 teńgeden 70 teńgege qymbattaýy múmkin. Bul týraly qala ákimdiginde ótken jıynda aıtyldy, dep habarlaıdy QazAqparat tilshisi.
Qala ákiminiń orynbasary Jandos Baırhanovtyń aıtýynsha, óńirdegi birden-bir jolaýshy tasmaldaýshy «Jolaýshy» JShS buǵan deıin de eki ret baǵany kóterý jaıynda usynys jasaǵan.
Jandos Baqytbekuly brıfıng barysynda baǵa qymbattaǵan jaǵdaıda qoıylatyn talaptarǵa toqtaldy. Máselen, avtobýstardy jańartý, jeńildikter jasaý, barlyq qoǵamdyq kólikterde kondýktorlardyń bolýy jáne júrgizýshilerdiń eńbekaqysyn kóterý, sondaı-aq, belgilengen mejege jetpeı qaıtyp ketetin júrgizýshilerdi de nazarǵa alýdy jetkizdi. Eger de atalǵan talaptar baǵa kóterilgenimen oryndalmaıtyn bolsa, bekitilgen aradaǵy shart kúshin joıatyndyǵyn basa aıtty. Al, «Jolaýshy» JShS-niń atqarýshy dırektory Medetbek Jumageldiuly sońǵy eki jylda qoǵamdyq kólikter turaqty, ıaǵnı 50 teńgemen qyzmet kórsetip, tasymaldap kelgendigin alǵa tartady. Sol eki jyl ishinde janar-jaǵarmaı (dızel) baǵasy 94 paıyzǵa óskendigin jáne kóliktiń qosalqy bólshekteri de birshama qymbattaǵandyǵyn aıtyp ótti.
«Qazirgi tańda qalaishilik baǵyttar boıynsha bizge tıesili qoǵamdyq kólikter sany 270-ti quraıdy. Onyń 150-i avtobýstar bolsa, qalǵany shaǵyn avtobýstar. Olardyń basym bóliginiń shyǵarylǵanyna 15 jyldan asqan. Jolaqy baǵasy kóterilse qoǵamdyq kóliktiń sapasynyń jaqsarýy men jańarýyna sep bolady», — dedi Medetbek Jumageldiuly.
Aıta keteıik, jolaqyny 20 teńgege kóterý jáne bul tarıfti esepteý máselesi boıynsha komıssııa otyrysy aıaqtalyp, tujyrymdamasy berilgen. Endi qalalyq máslıhat maquldasa, shahar basshysynyń qaýlysymen bekitiletin bolady.
