Túrkistanda jol erejesin saqtamaıtyn traktor júrgizýshileri kóp
Túrkistan oblysynda traktor júrgizýshileri 3 táýlikte 200 – den astam jol júrý erejelerin buzǵan. Onyń ishinde tehnıkalyq baıqaýdan ótpegeni úshin QR ÁQBtK-niń 590-baby 9-bóligimen 61 traktor júrgizýshisi jaýapqa tartylsa, tıisti ruqsatsyz qaıta jabdyqtalǵan kólik quralyn basqarǵan 8 traktorshyǵa ákimshilik shara kórildi. Al, qujatsyz traktor aıdaǵan 46 adamǵa hattama toltyryldy.
Sondaı-aq, kólik quralyn basqarý kezinde telefondy nemese radıostantsııany paıdalanǵan 23 júrgizshi anyqtaldy. Jol júrisi qaǵıdalarynyń júrý, qaıta aýystyrý, burylý, keri burylý nemese toqtaý aldyndaǵy sıgnal berý talabyn oryndamaǵan 15 quqyq buzýshylyq oryn aldy. Jol júrisine qatysýshynyń avarııalyq jaǵdaı týǵyzýǵa ákep soǵatyn jol júrisi qaǵıdalaryn 1 adam buzǵan.
«Tártip saqshylary kúzgi terim naýqany qarsańynda traktorlardyń qatysýymen bolatyn jol-kólik oqıǵalarynyń aldyn alý maqsatynda is-shara júrgizdi. Nátıjesinde 46 traktor aıypturaqqa qoıyldy. Ýchaskelik polıtsııa ınspektorlary men patrýldik polıtsııa tobynyń qyzmet ınspektorlary 90-ǵa jýyq traktor tirkemelerine jaryqqa shaǵylys beretin arnaıy belgilerin ornatty. Júrgizýshilerge túsindirme jumystaryn júrgizip, 270-ten astam arnaıy býkletter taratty» - delingen Túrkistan oblysy polıtsııa departamentiniń baspasóz qyzmeti taratqan aqparatta.
