Túrkistanda jol erejesin óreskel buzǵan júrgizýshiler jazalandy
TÚRKІSTAN. QazAqparat – Túrkistandyq polıtseıler jol qozǵalysy erejelerin óreskel buzǵan turǵyndardy jaýapkershilikke tartty. Túrkistan-Shymkent aınalma tasjolynda ereje buzǵandar joldyń qarsy betine shyǵyp, kóliktiń terezesinen shyǵyp otyrǵan, dep habarlaıdy QazAqparat tilshisi.
Áleýmettik jelilerde kósheniń qaq ortasynda jol qaýipsizdigi erejesin buzyp, júgensiz júrgen birneshe avtokólik jaıly beınejazba taraǵan bolatyn. Atalǵan beınekórnisti teksergen polıtseıler bul oqıǵanyń Túrkistan qalasynda bolǵanyn anyqtaǵan.
Tártip buzýshylardyń kim ekenin anyqtaý maqsatynda Túrkistan polıtseıleri qajetti is-sharalardy júrgizip, kináli júrgizýshilerdi ákimshilik jaýapkershilikke tartty.
«Toıota kamrı» júrgizýshisine qatysty 5 hattama toltyryldy. Atap aıtqanda, Ákimshilik quqyq buzý kodeksiniń 230-baby 2 bóligi, 590-baby 2 bóligi jáne 595-baby 1-bólimi, 593-baby 1 bóligi jáne 596-baby 3 bóligi boıynsha jazalanady. Al, «Aýdı» markaly kóliktiń júrgizýshisi kodekstiń 593-baby 1 bóligi boıynsha kináli dep tanylyp, hattama túzildi. Avtokólikter aıyp turaǵyna qoıyldy» delingen oblystyq PD baspasóz qyzmetiniń habarlamasynda.
Aıta keteıik, áleýmettik jelide osy quqyq buzǵandardyń arasynda polıtsııa qyzmetkeri bar degen aqparat taraǵan bolatyn.
Qazirgi tańda bul jáıt boıynsha da oblystyq polıtsııa departamenti jeke qaýipsizdik basqarmasy tekserý júrgizip jatyr.
