Túrkistanda jol apatynda janǵan kóliktiń júrgizýshisi syrtqa shyǵa almaı qaldy
ShYMKENT. QazAqparat - Túrkistanda júk kóligi men Aýdı mashınasy soǵysyp, jeńil kóliktiń júrgizýshisi kólikte janyp ketti. Taǵy tórt jolaýshy qalalyq aýrýhanaǵa jetkizilgen, dep habarlaıdy QazAqparat tilshisi.
Oqys oqıǵa 4-shi maýsym kúni túngi saǵat 22.35-ter shamasynda bolǵan. Kýágerleriniń sózinshe, jol apaty oryn alǵanda qatty soqqydan Aýdı kóligi órtenip ketken. Saldarynan joıqyn jarylys bolǵan. Oblystyq TJD baspasóz qyzmetiniń málimetinshe, jol kólik oqıǵasy Túrkistan qalasyndaǵy Bekzat Sattarhanov dańǵylynda oryn alǵan.
«Jol apaty kezinde Aýdı jeńil kóligi men júk kóligi soqtyǵysqan. Órt 10 mınýtta oqshaýlanyp, 20 mınýttyń ishinde tolyq sóndirildi. Qazir órttiń shyǵý sebebi anyqtalýda», - delingen habarlamada.
Al, dárigerlerdiń aıtýynsha, kólik oqıǵasynan zardap shekkender ortasha jaraqat alǵan.
«Tórt naýqas (eki əıel men eki jetkinshek) Túrkistan qalalyq ortalyq aýrýhanasyna jetkizilgen. Jaǵdaılary ortasha. Aýyr emes» - delingen oblystyq densaýlyq saqtaý basqarmasynyń baspasóz qyzmeti.
