Túrkistanda jol apaty bolyp, janjaldasqan júrgizýshilerdiń biri ekinshisin taspen uryp óltirdi
TÚRKІSTAN. QazAqparat- Túrkistanda tas atyp tóbelesken júrgizýshilerdiń biri qaıtys boldy, dep habarlaıdy QazAqparat tilshisi.
Oqıǵa Túrkistan qalasynan Kentaýǵa shyǵar jolda oryn alǵan. Ekeýara bolǵan eregistiń sońy adam ólimine alyp keldi. Júrgizýshilerdiń biri ekinshisin taspen urǵan. Saldarynan bir adam oqıǵa ornynda qaıtys boldy.
Kólikte kúdiktimen birge bolǵan ákesi jedel járdem shaqyrǵan. Dárigerler jábirlenýshiniń qaıtys bolǵanyn anyqtap, polıtsııaǵa habar beripti.
«Kúdikti jas jigit, Túrkistan qalasynyń turǵyny, buryn Almaty oblysynda tonaý áreketi úshin shartty túrde jazasyn ótegen. Ony polıtsııa qyzmetkerleri qylmys ornynda ustady. Oǵan qatysty QR QK-niń 99-baby «Adam óltirý» boıynsha sotqa deıingi tergeý amaldary júrgizilýde. Kúdikti ýaqytsha ustaý ızolıatoryna qamaýǵa alyndy. Saraptama taǵaıyndaldy. Oqıǵanyń mán-jaıyn polıtseıler sotqa deıingi tergeý barysynda anyqtaıtyn bolady»-delingen Túrkistan oblysy polıtsııa departamentiniń baspasóz qyzmeti taratqan habarlamada.
