Túrkistanda jezóksheler arqyly tabys taýyp júrgen «jeńgetaı» ustaldy
ShYMKENT. QazAqparat - Túrkistanda jezókshelerge arnalǵan taǵy bir prıton anyqtaldy. Qalalyq ishki ister basqarmasynyń qyzmetkerleri jeńil júriske salynǵan qyz-kelinshekterdi paıdalanyp, paıda taýyp kelgen kúdiktini qolǵa túsirdi. Bul týraly shahardyń prokýrory Rýslan Ábdiraıymov málimdedi, dep habarlaıdy «QazAqparat» HAA tilshisi.
Qala prokýrorynyń sózinshe, ustalǵan sezikti áıeldiń ústinen Qylmystyq kodekstiń 309 baby, «Jezókshelikpen aınalysýǵa arnalǵan prıtondar uıymdastyrý nemese olardy ustaý jáne jeńgetaılyq» áreketi boıynsha is qozǵalyp, tergeý amaldary júrgizilýde.
Aıta keteıik, Túrkistanda buǵan deıin de jezókshelerdiń «ordasy» tabylǵan bolatyn. Rýslan Ábdiraıymov ustalǵan jeńgetaılardyń bazbiri sottalǵanyn aıtady.
«QR Qylmystyq kodeksiniń 309 baby, 1 bóligi boıynsha bas bostandyǵynan aıyrý jazasy taǵaıyndalmaıdy degender qatelesedi. Túrkistan qalalyq sotynyń 15 tamyz 2017 jylǵy úkimimen 1973 jyly týǵan «G» degen azamatsha osy bappen túpkilikti 2 jyl 6 aıǵa bas bostandyǵynan aıyrylyp, sot zalynan qamaýǵa alyndy. Taǵaıyndalǵan jazany qylmystyq-atqarý júıesiniń ortasha qaýipsiz mekemelerinde óteıtin bolyp belgilendi»,-dedi Túrkistan qalasynyń prokýrory.
