Túrkistanda jetim balalar men kópbalaly otbasylar úı kezeginen sebepsiz shyǵarylǵan
Túrkistanda Turǵyn úı-kommýnaldyq sharýashylyǵy bólimi tarapynan turǵyn úı berý kezinde 2018 jyly 2330 adam kezekte turǵanyna qaramastan, 2019, 2020, 2021 jyldary kezekte turǵan azamattarǵa kezekten tys turǵyn úı berý faktileri anyqtalǵan. Sondaı-aq, jetim balalar men ata-anasynyń qamqorlyǵynsyz qalǵan balalar jáne kóp balaly otbasylar turǵyn úı kezeginen sebepsiz shyǵarylǵan.
Al, aýyl sharýashylyǵy salasyna jasalǵan taldaý jumystarynyń barysynda sýbsıdııany jymqyrý úshin jyl saıyn birdeı shemalar qoldanylyp kelgen. Bul baǵytta aýyl sharýashylyǵyna qatysy joq tulǵalarǵa sýbsıdııa bólý, shyǵyndy kásiporyndardy ınvestıtsııalaý jáne taǵy basqa kemshilikter anyqtalǵan.
Sondaı-aq, mundaı kemshilikter bilim berý, áleýmettik qoldaý, medıtsına salasynanda tabylǵan.
«Bilim berý salasynda júrgizilgen syrtqy taldaý nátıjesinde jalǵan dıplomdardy paıdalaný, sottalǵan pedagogtardy jumysqa ornalastyrý, sapasyz oqýlyqtardy satyp alý, jumysqa negizsiz qabyldaý, baqylaýshy organdardy birjaqty tekserý, biliktilik sanattaryn zańsyz berý sekildi faktiler anyqtaldy. Áleýmettik qoldaý salasynda áleýmettik jumys oryndaryna kezekten tys jumyssyzdardy jumysqa ornalastyrý, jumys berýshi tarapynan aı saıynǵy mindetti zeınetaqy jarnalaryn aýdarmaý sekildi zań buzýshylyqttar bar. Medıtsına salasynda jabdyqtardy satyp alýǵa, olardyń baǵasyn kóterýge, sondaı-aq ǵımarattardy negizsiz esepten shyǵarý jáne ǵımarattar men qurylystardy jóndeý mánine monıtorıng júrgizilýde» – dedi Dáýlet Narymbetov.
