Túrkistanda jeke kásipkerdiń 13 jylǵa sozylǵan máselesi sheshimin tapty
Basqosýda bıznes ortada sybaılas jemqorlyqqa qarsy minez-qulyq úlgisin qalyptastyrý men kásipkerlerdiń sybaılas jemqorlyqqa yqpal etetin sebepter, jaǵdaılardy joıýǵa belsendi qatysýyn qamtamasyz etý máseleleri talqylandy, dep habarlaıdy QazAqparat tilshisi.
Bıznes ortadaǵy ózekti máseleler ortaǵa salynǵan alqaly jıynǵa QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń basshysy Hakım Kóshqalıev,Túrkistan oblysy Kásipkerler Palatasynyń dırektory Tımýr Nahıpbekov jáne jergilikti atqarýshy jáne aýmaqtyq organdar men bıznes-qaýymdastyq ókilderi qatysty.
Jıynda otandyq jáne sheteldik ınvestorlar úshin qolaıly jaǵdaı jasaý jáne kásipkerlerdiń quqyqtary men zańdy múddelerin qorǵaý máseleleri sóz boldy.
H.Kóshqalıev el ekonomıkasyna ınvestıtsııalardyń kelýin jeńildetý, bıýrokratııa tártipterin jáne sybaılas jemqorlyq derekterin boldyrmaý maqsatynda Agenttiktiń bastamasymen «Protecting Business and Investments» jobasy Túrkistan óńirinde qarqyndy júzege asyrylyp jatqandyǵyn baıandap, joba aıasynda búgingi kúni Departament tarapynan jalpy somasy 621 mlrd teńge quraıtyn 49 ınvestıtsııalyq joba súıemeldeýge alynǵandyǵyn jetkizdi.
Sondaı-aq, kezdesýde sóz alǵan Agenttiktiń Túrkistan oblysy boıynsha departamenti basshysynyń birinshi orynbasary Mıras Qarǵabaı atalǵan joba sheńberinde túrkistandyq jeke kásipkerdiń 13 jyl boıy sheshilmeı júrgen sharýasy 7 kún ishinde sheshimin tapqandyǵyn aıtty. Sondaı-aq 2020 jyly jalpy sany 15 kásipkerlik sýbektisiniń quqyqtary qalpyna keltirilip, shaǵyn jáne orta kásipkerlik bıznesine zańsyz aralasýdyń 18 deregi áshkerelený arqyly jergilikti atqarýshy organdardan 10 laýazymdy tulǵa sot úkimimen sotty bolǵan.
Budan bólek, quqyq buzýshylyqtardyń aldyn alý jáne uıymnyń iskerlik bedelin qorǵaý maqsatynda kvazımemlekettik jáne jeke sektor uıymdarynda korporatıvtik adaldyq standarttaryn saqtaýǵa jaýapty sybaılas jemqorlyqqa qarsy komplaens-qyzmetter ınstıtýty engizilgenin alǵa tartty.
Sonymen qatar Túrkistan oblysynda kvazımemlekettik sektordyń barlyq uıymdarynda komplaens bólimshelerin qurý arqyly kommertsııalyq kompanııalar arasynda sybaılas jemqorlyqqa qarsy kúresti kúsheıtý qajettigin aıtty.
Bıznesti qorǵaý máseleleri erkin formatta talqylanǵan jıyn sońynda Túrkistan oblysyndaǵy kásipkerliktiń damýyna kedergi keltiretin ózekti problemalyq máseleler men karantın rejıminde saqtalýy tıis negizgi shekteýler ortaǵa salynyp, óńirdegi kásipkerlerdiń usynys-pikirleri tyńdaldy.
Aıta ketsek, Departamentpen kelisimge qol qoıǵan ınvestorlar aldaǵy ýaqytta 100% sybaılas jemqorlyq faktilerinen 24/7 prıntsıpi negizinde qorǵalatyn bolyp kelisildi.