Túrkistanda jaıylym jerlerdiń aýmaǵy 742 myń gektarǵa ulǵaıdy
Oblys ákiminiń tapsyrmasymen daıyndalǵan algorıtm boıynsha jaıylym tapshylyǵy oryn alǵan 152 eldi meken mańyndaǵy halyqtyń muqtajyna alynatyn ýchaskeler anyqtalyp, basymdylyq berildi.
Óńir basshysy Ómirzaq Shókeevtiń tóraǵalyǵymen ótken lezdemelik májiliste jer qatynastary basqarmasynyń basshysy Samat Ramazanov jer salasyna qatysty berilgen tapsyrmanyń oryndalýy týraly baıandady. Bekitilgen is-josparǵa sáıkes, aǵymdaǵy jyly І-jarty jyldyqta 66,4 myń ga ІІ - jarty jyldyqta 63,2 myń ga, jalpy 130 myń gektarǵa jýyq jaıylymdyq jerlerdi halyqtyń muqtajyna alý josparlanýda. Alynatyn ýchaskeler naqtylanyp jatyr. Nátıjesinde jyl sońyna deıin halyqtyń paıdalanatyn jaıylym jerlerdiń kólemi 742 myń ga nemese 21% artpaq. Jalpy Túrkistan oblysynda 3 mln 200 myń gektar jaıylymdyq jer bar. Jaıylym jerlerdi eldi mekender shegine engizý jolymen aýyl okrýgteri ákimderiniń tikeleı jaýapkershiligine beriledi. Turǵyndardyń basqa da muqtajdyǵyna qajet bolǵan jerdi jergilikti qoǵamdyq baqylaý uıymdarynyń kelisimi qajet. Bul baǵyttaǵy jumystar halyqty jaıylym jermen tolyq qamtylǵansha turaqty baqylaýda. Jıynda sondaı-aq, Túrkistan qalasy aýmaǵyn kógaldandyrý boıynsha atqarylǵan jumystardyń barysy jaıly jaýapty basqarma basshylary baıandady. Qalany kógaldandyrý úshin oblys aýdandary men basqarmalary 32 sektorǵa bólingen. Ár sektor 10 myńǵa deıin aǵash kóshetterin otyrǵyzyp, sý júıesin ornatyp, uńǵymalar qazyp, nasostar qoıýda. Gazon egip, jańbyrlatyp sýarý júıesin engizýde. Qala aýmaǵynda terek, qaraǵash, shyrsha, shaǵan, arsha, úıeńki aǵashtary otyrǵyzyldy. Jelden qorǵaý maqsatynda aǵash tireýishter ornatylyp, tórt jaǵynan jippen tartyldy. Alda aǵashtardy pasporttaý bastalady. Budan bólek, jol boıyna gúl egetin qumyralar ornatylyp, jaryqtandyrylatyn bolady. Velojoldar tóselip, kóshelerde jaryq shamdar, qoqys jáshikteri men yńǵaıly oryndyqtar ornatyldy. Bul aýmaqtarda turaqty túrde senbilik jumystary júrgizilýde. Májiliste budan ózge oblystaǵy sý tasqyny jaǵdaıy baıandaldy. Apattyń aldyn alý maqsatynda jalpy tórt jyl kóleminde 71 shq qorǵanys dambasy, 75 shq astam ózenderdiń boıynda arna túzetý men jaǵa bekitý, 262 shq kanaldardy jóndeýden ótkizilgen. 430 shaqyrym kollektorlar mehanıkalyq turoǵyda tazartylǵan Aqsúmbe, Baqyrly, Aşy sý qoımalary kúrdeli jóndeýden ótken. Sondaı-aq, Syrdarııa ózeni boıyndaǵy 22 eldi mekendi qamatamysyz etip otyrǵan «Úlken sý» dabyl berý júıesi qaıta jańǵyrtylǵan. «2021-2023 jyldarǵa arnalǵan sý tasqynyna qarsy is-sharalar kesheni» Jol kartasynyń jobasyna 20 is-shara engizilip, jaǵalaýdy nyǵaıtý men túzetý jumystarynyń ýaqytyly aıaqtalýy baqylaýda bolady. Kóktemgi sý tasqynyn aldyn alýǵa qajetti qural-jabdyq qory jasaqtalyp, oblys aýmaǵyndaǵy azamattyq qorǵaý qurylymdarynyń 5 myńnan astam jeke quramy, 1 myńnan astam tehnıkasy daıyndyqqa keltirilgen.
