Túrkistanda «jasyl beldeý» aýmaǵy 13500 gektarǵa jetti
TÚRKІSTAN. QazAqparat - Túrkistan qalasynyń aınalasyn kógaldandyrý maqsatynda iske asyp jatqan «Jasyl beldeý» jobasynyń jalpy aýmaǵy 2 ese ulǵaıyp, 13 500 gektarǵa jetti, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Baspasóz qyzmetiniń málimetterine qaraǵanda, jyl sońyna deıin jasyl aýmaq kólemin 20 000 gektarǵa jetkizý josparlanýda.
Túrkistannyń tabıǵı tynysyna aınalǵan aýqymdy shara týraly Túrkistan oblysynyń ákimi Ómirzaq Shókeevtiń tóraǵalymen ótken aptalyq apparat otyrysynda Túrkistan oblysynyń tabıǵı resýrstar jáne tabıǵat paıdalanýdy retteý basqarmasynyń basshysy Qaırat Ábdýalıev málimdedi.
Oblys ákiminiń bastamasymen shahardy jasyl jelekke bólep, klımatyn ózgertý úshin 2019-2022 jyldary Túrkistan qalasynyń aınalasynan 7700 ga jerge «Jasyl beldeý» qurý josparlanyp, búgingi tańda bul jumystar merziminen buryn tolyǵymen oryndaldy.
«Ótken jyly «Kazatomprom» aktsıonerlik qoǵamynyń qoldaýymen 5800 gektar jerge sekseýil aǵashy egildi. Onyń ishinde 3300 ga jerge kóshet otyrǵyzylyp, 2500 ga jerge uryq sebildi. Túrkistan qalasyndaǵy halyqaralyq aeroport jolynyń boıy 252 ga jer telimi tolyqtaı tamshylatyp sýarý júıesine qosyldy»,-dedi basqarma basshysy óz baıandamasynda.
Jınalysta óńirdiń sanıtarlyq epıdemıologııalyq jaǵdaıy talqylandy.
Qazirgi ýaqytta Túrkistan oblysy koronavırýs kórsetkishi boıynsha QR boıynsha «jasyl» aımaqta ornalasqan. Osy kúnge deıin 44 myńnan astam túrkistandyq erikti túrde vaktsına saldyrdy. Túrkistan oblysyna otandyq «QazVac» vaktsınasynyń 2000 dozasy jetkizildi. Josparǵa sáıkes jyl sońna deıin 200 myńǵa jýyq «Spýtnık-V» jáne «QazVac» otandyq vaktsınamen qamtamasyz etý josparlanyp otyr. Jalpy 660 myń adam PTR test tapsyrǵan.
