Túrkistanda jastar jylynyń jabylýyna oraı Town Hall formatynda jıyn ótti

TÚRKІSTAN. QazAqparat - Oblys ortalyǵynda «Túrkistan qalasyn túrki áleminiń rýhanı-mádenı ortalyǵyna aınaldyrýdaǵy jastardyń róli» atty «Town Hall» formatyndaǵy jıyn ótti, dep habarlaıdy QazAqparat oblys ákiminiń baspasóz qyzmetine silteme jasap.

Bıyl Elbasy, QR Tuńǵysh Prezıdenti N.Nazarbaevtyń Jarlyǵymen jarııalanǵan «Jastar jyly» qorytyndylanyp, Memleket basshysy Qasym-Jomart Toqaevtyń jarlyǵymen 2020 - «Eriktiler jyly» jarııalanǵan bolatyn.

Osy oraıda, jıynǵa jas kásipkerler men ǵalymdar, volonterler, óner men sportta bıik belesterdi baǵyndyryp júrgen oblysqa tanymal, belsendi jastar qatysty. Jastar jylyn qorytyndylaý keshinde oblys kóleminde memlekettik jastar saıasatynyń damýyna úles qosyp, eldiń saıası jáne qoǵamdyq ómirine belsene aralasqan jas azamattar, túrli salada óziniń bilimimen, belsendiligimen top jarǵan jas patrıottarmen Túrkistan qalasynyń ósip-órkendeý jolyndaǵy jastardyń róli jaıly erkin formatta áńgime órbidi.

Jıynǵa arnaıy qatysqan oblys ákiminiń orynbasary Sáken Qalqamanov oblysta qarqyndy jumys atqarǵan jastarǵa jyly lebiz bildirdi.

«Qazaq eliniń zaıyrly memleket retinde qalyptasýy, Túrkistannyń túrlenýi – sizderdiń qoldaryńyzda. Siz ben biz ult rýhanııaty men ulttyq ıdeologııanyń damýyna, elimizdiń órkendeýine, Qazaqstannyń bolashaǵy úshin aıanbaı eńbek etýimiz qajet», - dep jastarǵa úlken senim bildirdi.

Sóz tizginin alǵan «Jas Otan» JQ Túrkistan oblystyq fılıalynyń tóraıymy Juldyz Namaz jastar jylynda jasotandyqtardyń atqarǵan jumystary men eriktiler jylynda atqarylatyn jobalar jaıynda baıandap, Elordada ótken jastar forýmynda Prezıdentimizdiń jastarǵa degen amanatyn jetkizdi.

Sondaı-aq, sharada, «PROON» sertıfıkatynyń ıegeri «Torlan stroı» JShS atqarýshy dırektory Shadııar Týleev pen jas ǵalym «Álemdik ekonomıka» boıynsha PhD doktorant Amalbek Ómirtaı, Kentaý transformator zaýytynyń dánekerleý óndirisiniń bas mamany Erbolsyn Jamanqulov, «DS Group» kompanııasynyń dırektory Serikbol Danyshbaev, oblystyq «Nıý Djenıreıshn lıders» eriktiler tobynyń jetekshisi Aıdana Esirkep sóz sóılep, óńir basshysyna alǵysyn bildirdi.

Jıyn jastar jyly aıasynda túrli salalarda jetistikke jetken, aýdan-qalalardan iriktelip kelgen, júzden júırik, myńnan tulpar shyqqan úzdik jastardy marapattaý rásimimen jalǵasty.

Atap óteıik, Túrkistan oblysynda jastar sany - 507 970. Bul - oblys halqynyń 25,2 paıyzy.