Túrkistanda jastar forýmy ótti
TÚRKІSTAN. QazAqparat – Túrkistanda QR Tuńǵysh Prezıdenti kúnine oraı «Dıalog. Senim. Bolashaqqa nyq qadam» atty jastar forýmy ótti, dep habarlaıdy QazAqparat.
Jastar men stýdentter jyl saıyn atalmysh forýmda bas qosyp, shahardyń ósip-órkendeýin talqylaıdy. Bul jastardyń - bıznes, óner jáne tehnologııa salasynda ózderin tolǵandyratyn máseleler boıynsha pikir almasatyn alańy, sondaı-aq Túrkistan qalasynyń ákimi Rashıd Aıýpovpen ashyq áńgimelesýge birden-bir múmkindik.
Sharada kóterilgen suraqtar: Medıakeńistikti paıdalana otyryp bıznesti qalaı júrgizýge bolady? Súıikti isiń arqyly paıda taba alasyz ba? Bıznesti qalaı bastaımyn? Franshıza degenimiz ne? Bızneske salatyn qarjyny qalaı tabýǵa bolady? Kraýdfandıng arqyly 15 000 dollar jınaý múmkin be?
Ózderiniń jetistikke jetý jolyndaǵy tájirbıelerimen bes kásipker bólisti. Olardyń arasynda belgili blogerler komandasy TJokers - Janserik Qadyrbaev, StudyON lıngvıstıkalyq mektebiniń negizin qalaýshy - Shahnoza Nyshanqulova bar. Sh.Nyshanqulova álemdik sýper-juldyz Lady Gagamen birge istegen jumysy, Kanadadaǵy óz startapy jáne Shymkent qalasynda iske asyryp jatqan jobalarymen tanystyrdy.
