Túrkistanda jasóspirimder tárbıesi talqylandy
TÚRKІSTAN. QazAqparat -Túrkistanda kámelettik jasqa tolmaǵan jasóspirimder arasyndaǵy qylmys pen quqyqbuzýshylyqtyń aldyn alý jáne bilim salasyndaǵy birqatar ózekti máseleler qozǵalǵan májilis ótti, dep habarlaıdy QazAqparat tilshisi.
Jıynǵa oblystyq basqarma basshylary, aýdan-qala ákimderiniń orynbasarlary men bilim bóliminiń basshylary, ishki ister departamenti men jergilikti polıtsııa jáne prokýratýra ókilderi qatysty
Májiliske tóraǵalyq etken Túrkistan oblysy ákiminiń orynbasary Málik Otarbaev jasóspirimder arasyndaǵy quqyqbuzýshylyq boıynsha birqatar máselelerge toqtalyp, barlyq bilim bólimderi men mektep basshylaryna, jergilikti polıtsııa, ustazdar qaýymy, ishki saıasat, otbasy, balalar jáne jastar isi jónindegi basqarmalarǵa tapsyrma berdi. Qylmysty boldyrmaý baǵytyndaǵy jumystar kúsheıtilip, oblys ákimdigi tarapynan únemi baqylaýda bolatynyn jetkizdi.
Oblystyq bilim basqarmasynyń basshysy Isataı Saǵyndyqov oqýshylar arasyndaǵy quqyqbuzýshylyqty joıý baǵytyndaǵy usynystaryn ortaǵa salyp, oqýshylar tárbıesine ata-ananyń jaýapkershiligin kúsheıtý kerektigin atap ótti.
Telearnalardan arnaıy baǵdarlama ashyp, quqyqbuzýshylyqqa qarsy túsindirme jumystaryn júrgizý sııaqty oılarymen bólisti. Túrkistan oblystyq polıtsııa departamenti basshysynyń birinshi orynbasary Abaı Júsipov bolsa tártibi qıyn balalardy qoǵam bolyp atsalysyp, jaqsy baǵytqa burý kerektigin aıtty. Áleýmettik jeliler men aqparat quraldarynda zorlyq-zombylyqty kórsetetin beınamaterıaldar júkteýdiń, kámelettik jasqa tolmaǵan balalardyń bet-júzin ruqsatsyz jurtshylyqqa taratýdyń da jaýapkershiligi bar ekenin eskertti.
Jıynda ózge de azamattar usynys pikir bildirip, ortaǵa saldy.
Nátıjesinde bilim berý mekemelerinde beınebaqylaý kameralary kóbeıtilip, mektep ınspektorlary men ýchaskelik polıtseılerdiń jumysy qadaǵalanatyn boldy. Mektepterde sybaılas jemqorlyqqa qarsy kúres kúsheıip, tehnıkalyq mamandardy qabyldaý isi tolyq aýtsorsıngke ótedi dep kútilýde.
Jıyndy túıindegen Málik Otarbaev qala-aýdan ákimderiniń orynbasarlary men basqarma basshylaryna jáne aýdandyq ishki saıasat, bilim bólimderiniń basshylaryna joǵaryda sóz bolǵan tapsyrmalardy sapaly oryndaýdy mindettedi.
