Túrkistanda jasandy kól salynyp jatyr
TÚRKІSTAN. QazAqparat - Túrkistanda jasandy kól salynyp jatyr, dep habarlaıdy QazAqparat tilshisi.
Jasandy kóldiń aýmaǵy (56 000 m3) qazylyp, tireýish qabyrǵaly jaǵalaýy beton quıý jumystaryna daıyndalyp jatyr. Bul kól Túrkistandaǵy tartymdy demalys oryndarynyń biri bolady degen jospar bar.
Túrkistan qalasynda jańadan salynyp jatqan nysandardyń qurylysyn aralap kórgen oblys ákimi Ómirzaq Shókeev jumystardy merziminde bitirý kerektigin tapsyrdy.
Bıyl Túrkistan qalasynda Bekzat Sattarhanov atyndaǵy sport kesheni paıdalanýǵa beriledi. Qazirgi tańda nysannyń jer jumystary men irgetasyn qalaý isi tolyq aıaqtalǵan. Jertóle qabyrǵasy men birinshi qabattaǵy tirek qabyrǵasy da aıaqtalýǵa jaqyn tur. Nysan basynda 30-dan astam jumysshy bar.
Bul sport kesheninde Á.Nurmahanov atyndaǵy olımpıada rezerviniń mamandandyrylǵan balalar-jasóspirimder sport mektebiniń ujymy ornalasady. 320 orynǵa arnalǵan qosymsha ǵımaraty sportty damytýǵa serpin bermek.
Túrkistan qalasyndaǵy halyqaralyq tennıs ortalyǵynyń qurylysy da qarqyndy. Bul ortalyq ta bıyl paıdalanýǵa beriledi.
