Túrkistanda jas ánshiler tanymal kompozıtorlardyń ánderin shyrqady
TÚRKІSTAN. QazAqparat - Túrkistanda jas ánshilerdiń «Baldáýren» kontserttik baǵdarlamasy ótti. Merekelik sharada óńirdiń barlyq aýdan, qalalarynan kelgen jas daryndar patrıottyq jáne baldáýren balalyq shaq jaıly belgili kompozıtorlardyń ánderin shyrqap, bı bıledi, dep habarlaıdy QazAqparat tilshisi.
«Jeńis» saıabaǵyndaǵy kontserttik baǵdarlamany tamashalaýǵa 5000-nan asa qala qonaqtary men turǵyndar jınaldy. Oblystyq Mádenıet jáne tilderdi damytý basqarmasy men Mádenıet jáne halyq shyǵarmashylyǵy ortalyǵy uıymdastyrǵan sharaǵa «Qalqanqulaq» fılminiń basty rólin somdaǵan jas akterler Ádilhan Nurıman men Sirgebaı Ersultan «Qalqanqulaq» ánin oryndap, kórermenderdiń yqylasyna bólendi.
Shara barysynda sondaı-aq, jas ánshiler ánnen shashý shashyp, saıabaqqa kelgen jurshylyqqa kóterińki kóńil kúı syılady. Olardyń arasynda oblystyq, respýblıkalyq baıqaýlarda top jaryp júrgen júldegerler de bar. Ertegi keıipkerleri balalarmen birge oıyn oınap, qııal - ǵajaıyptar álemine engizdi. Búldirshinderge arnalǵan attraktsıondar da balǵyn balalardy shat-shadyman kúıge bóledi.
Aıta keteıik, balalardyń qýanyshyna arnalǵan shara «Jastar jyly» aıasynda daryndy balalar men jasóspirimderdiń shyǵarmashylyǵyna qoldaý kórsetý men olardy otansúıgishtikke baýlý, ulttyq rýhta tárbıeleý men qoldaý kórsetý maqsatynda uıymdastyryldy. Oblystyń ár aýdan-qalalaryndaǵy mádenıet úıleri men klýbtarda oqyp júrgen jas daryndardy tanytý men úlken sahnaǵa shyǵarý kózdelgen.
