Túrkistanda jas aqyn-jazýshylar men jýrnalıster arasynda baıqaý ótedi

TÚRKІSTAN. QazAqparat - Bıyl Qazaq eliniń táýelsizdigine 30 jyl tolyp otyr.Mereıli mereıtoı qarsańynda el jetistigin keńinen nasıhattaý maqsatynda Túrkistan oblysynda jas aqyn-jazýshylar men jýrnalıster arasynda baıqaý ótedi. Bul týraly oblystyq qoǵamdyq damý basqarmasynyń basshysy Damır Júnisov Óńirlik kommýnıkatsııalar qyzmetinde ótken brıfıngte aıtty, dep habarlaıdy QazAqparat.

«QR Prezıdenti Q.Toqaevtyń Táýelsizdiktiń 30 jyldyǵyn merekeleý jónindegi komıssııa otyrysynda bergen tapsyrmalaryn oryndaý, Táýelsizdiktiń qadiri men qasıetin arttyrý, Táýelsizdik jyldarynda jetken el jetistikterin ádebıet jáne aqparat salasynyń ókilderi arqyly keńinen nasıhattaý maqsatynda ótetin baıqaýǵa 30 jasqa deıingi jas aqyn-jazýshylar men jýrnalıster qatysa alady. Baıqaý barysynda táýelsizdiktiń jemisi retinde Elbasynyń bastamasymen qurylyp, Memleket basshysynyń qadaǵalaýymen damýy júzege asyp jatqan Túrkistan oblysynyń jetistigi, oblys ortalyǵy - Túrkistan qalasynyń jańarǵan kelbeti taqyrybyna erekshe kóńil bólinedi. Oblystyq qoǵamdyq damý basqarmasy jáne Qazaqstan Jazýshylar jáne Jýrnalıster odaǵynyń Túrkistan oblystyq fılıaldarynyń uıytqy bolýymen qolǵa alynǵan «Táýelsizdik Qarlyǵashtary» atty saıysqa Túrkistan oblysy men Shymkent qalasynan úmitkerler qatysa alady. Baıqaýdyń barlyq talaptary týraly 8 aqpan kúni basqarmanyń feısbýk jelisindegi resmı paraqshasynda jarııalanatyn bolady», - dedi basqarma basshysy.

Baspasóz máslıhatynda QR Jýrnalıster odaǵynyń Túrkistan oblystyq fılıalynyń tóraǵasy Ǵalymjan Elshibaı Táýelsizdiktiń qadir-qasıetin arttyrý arqyly jas aqyn-jazýshylar men BAQ ókilderiniń shyǵarmashyǵy tanylatyndyǵyn aıtty.

«Eń mańyzdysy, baıqaý arqyly elimizdegi árbir azamat «táýelsizdik« degen uǵymnyń maǵynasyn tereń uǵynady dep senemin. Ásirese, jas býynǵa túsindirýde, boıyndaǵy ultjandylyq sezimin oıatýǵa múmkindik bereri anyq. Táýelsizdiktiń mánin uǵyný, baǵasyn bilý, qunyn arttyrý – búgingi basty mindetimiz. Barsha shyǵarmashyl jastarǵa sáttilik tileımiz»,-dedi fılıal tóraǵasy.

Sondaı-aq, brıfıngte sóz alǵan Qazaqstan Jazýshylar odaǵynyń Túrkistan oblystyq fılıalynyń tóraǵasy Álibek Shegebaı

«Burynǵy ádebı shyǵarmalardyń deni táýelsizdikti ańsaýmen jazylǵan. Al qazirgi táýelsizdik kezeńde dúnıege kelip, búgingi qoǵamda ómir súrip jatqan jastar táýelsizdikti qalaı túsinedi? Olardyń armany ne? Baıqaýda jastardyń táýelsizdik týraly shyǵarmalaryn taldaıtyn bolamyz», degen Á.Shegebaı jastarǵa baıqaýǵa belsendi qatysýǵa shaqyrdy.

Atap óteıik, «Táýelsizdik qarlyǵashtary» shyǵarmashylyq baıqaýy 8 aqpan men 15 naýryz aralyǵynda ótedi. Jeńimpazdar Ulystyń uly kúni Naýryz merekesi qarsańynda marapattalady. Baıqaýda úzdik dep tanylǵan qatysýshylarǵa arnaıy syılyqtar tabystalmaq.