Túrkistanda jarty jylda 324 adam memleketten nesıe alyp, bıznes bastaǵan
TÚRKІSTAN. QazAqparat - Túrkistan oblysynda «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda 300-den astam kásipkerge nesıe berilgen, dep habarlaıdy QazAqparat oblys ákiminiń baspasóz qyzmetine silteme jasap.
«Jalpy, osynaý jumystarǵa bıylǵa 3,282 mlrd teńge qaralyp, nesıe berý jumystary júrgizilip jatyr. 2018 jyldyń І jarty jyldyǵynda atqarylǵan jumystardyń ishinde «Aýyl sharýashylyǵyn qarjylaı qoldaý qory» AQ arqyly 260 adamǵa nesıe berilse (1 122,5 myń teńge), mundaǵy 184 kásipker mal sharýashylyǵymen aınalysady. 6 paıyzdyq ústememen 7 jylǵa berilgen ózge de kredıtter jylyjaı, jıhaz óndirisi jáne shashtaraz kásibine buıyrdy» delingen habarlamada.
«Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan» baǵdarlamasyn iske asyrýdyń ekinshi tarmaǵy boıynsha «Agrarlyq nesıe korporatsııasy» AQ arqyly 64 adamǵa (201 652 myń teńge) 6 paıyzben 7 jylǵa nesıe rásimdelgen. Onyń 63-i - mal sharýashylyǵyna qatysty bıznes bolsa, 1-eýi - jylyjaı salasyna tıesili.
Odan bólek, nátıjeli jumyspen qamtý, jappaı kásipkerlikti jáne kooperatıvterdi damytýǵa respýblıkalyq bıýdjetten qosymsha 3 mlrd teńgege ótinim berilip, onyń 1,8 mlrd teńgesi qoldaý tapqan.
