Túrkistanda jańadan salynǵan ǵımarattar satylyp jatqan joq – qala ákimi
TÚRKІSTAN. QazAqparat - Túrkistan qalasyndaǵy Shyǵys monshasy, Vızıt ortalyq, Jeńis saıabaǵy sekildi jańadan salynǵan ǵımarattar satylyp jatyr degen aqparat shyndyqqa janaspaıdy. Bul týraly qala ákimi Nurbol Turashbekov málimdedi, dep habarlaıdy QazAqparat tilshisi.
Áleýmettik jelide Túrkistan qalasyndaǵy ǵımarattardyń satylyp jatqandyǵy týraly aqparat taraǵan bolatyn. Qala ákiminiń aıtýynsha, olar satylǵan joq, senimgerlik basqarýǵa berilgen.
«Áleýmettik jelide de, halyqtyń arasynda da bul jaǵdaı úlken rezonans týdyrdy. Muny durys túsiný kerek. Senimgerlik basqarý degenimiz - jekemenshikke berý emes. Kelisimshartqa oraı, nysandy senimgerlik basqarýǵa alǵan kásipker kútip ustaý jumystaryn júrgizedi. Oǵan bıýdjetten qarjy jumsalmaıdy», - dedi Nurbol Turashbekov.
Sondaı-aq, qala ákimi aldaǵy ýaqytta senimgerlik basqarýǵa alleıalar men saıabaqtar da beriletindigin aıtty.
«Memleket tarapynan salynyp jatqan ǵımarattardy kútip ustaý ońaı sharýa emes. Máselen, «Jibek joly» saıabaǵyn senimgerlik basqarýǵa alǵan kásipker óz bıznesin júrgizedi, ári halyqqa qyzmet kórsetedi. Eń bastysy, nysandy kútip ustaıdy. Eger talaptardy oryndamasa, kelisimshartty birjaqty buzamyz», - dedi ákim.
Aıta keteıik, jekeshelendirý jospary aıasynda 228 nysan 60 mlrd. teńgege satylǵany habarlanǵan bolatyn .
