Túrkistanda jańa jáne dástúrli medıa taqyrybynda forým ótti
TÚRKІSTAN. QazAqparat – Túrkistan oblysynda buqaralyq aqparat quraldary ókilderiniń basyn qosqan «Jańa jáne dástúrli medıa: yntymaqtastyqtyń zamanaýı modelderi» atty medıa forým ótti, dep habarlaıdy QazAqparat tilshisi.
Q.A.ıAsaýı atyndaǵy HQTÝ-da ótken forým Qazaqstan Jýrnalıster odaǵy Túrkistan oblystyq fılıalynyń uıymdastyrýymen jáne oblystyq Qoǵamdyq damý basqarmasynyń qoldaýymen ótti.
Keleli basqosý elimizdiń basty basylymy «Egemen Qazaqstan» gazetiniń 100 jyldyq mereıtoıyna arnaldy. Forýmda bir ǵasyrlyq tarıhy bar gazette eńbek etken ardagerlerge qurmet kórsetilip, basylymnyń búgingi jańashyl qadamdary úlgi etildi. Túrkistan, Jambyl, Qyzylorda oblystarynan, Almaty, Shymkent qalalarynan kelgen belgili jýrnalıster respýblıkamyzdyń bas gazetiniń torqaly toıyna qutty bolsyn aıtty. Al, forým jumysyn júrgizip otyrǵan Qazaqstan Jýrnalıster odaǵy Túrkistan oblystyq fılıalynyń tóraǵasy Ǵalymjan Elshibaı «Egemen Qazaqstan» respýblıkalyq gazeti» AQ Basqarma tóraǵasy Darhan Qydyráliniń quttyqtaý hatyn oqydy.
«Búgingi aqparat aıdyny óte shapshań damýda. Osyndaı syndarly kezeń zamana kóshine ilesip qana qoımaı, kez-kelgen qıyndyqtardan jańashyldyqpen jol taýyp, tyń pikirlermen zamanaýı tilmen aıtqanda kreatıvti ıdeıalarǵa arqa súıeýdi qajet etedi. Mundaı jaǵdaıda medıakeńistikte ter tógip, aqparat salasynyń qazanynda qaınap júrgen qyzmetkerlerdiń basyn qosý, tájirıbe bólisýdiń mańyzy óte zor. Tek Túrkistan ǵana emes, respýblıkanyń birneshe óńirindegi buqaralyq aqparat quraldarynyń, blogerleriniń basyn qosqan búgingi medıaforýmnyń alǵa qoıǵan maqsaty – osy salada júrgen mamandardyń tájirıbesin ushtaý, qundy pikirlerdi alǵa qaraı ilgeriletý dep esepteımin», - delingen Basqarma tóraǵasynyń quttyqtaý hatynda.
Alqaly jıynǵa Qazaqstan Jýrnalıster odaǵy basqarmasynyń tóraǵasy Seıitqazy Mataev qatysyp, jýrnalıstıka salasynda týyndap júrgen keleli máselelerdi qoǵady. Belgili qalamger, «Alash» ádebı syılyǵynyń ıegeri, jazýshy Marhabat Baıǵut «Egemenniń» el tarıhyndaǵy erekshe orny men búgingi ózgeshe baǵyty týraly áńgimeledi. Jas jýrnalısterdi jańashyldyqqa, óz mindetin atqarýda jaýapkershilikke úndedi. Al, «Egemen Qazaqstan» gazetiniń Jambyl oblysy boıynsha menshikti tilshisi Hamıt Esaman basylymnyń búgingi baǵytyna, jańa aıdarlarǵa keńinen toqtaldy. Sondaı-aq, jıynda Túrkistan oblysy qoǵamdyq damý basqarmasynyń basshysy Damır Júnisov óńirde atqarylyp jatqan jumystar jóninde baıandady. Forýmda «Zań medıa» JShS-i bas dırektory Dosymbek Qonysbek pen «Otyrar» medıaholdınginiń dırektory Áıgerim Jumaǵulova, «Ońtústik rabat» gazetiniń redaktory Jánibek Nurysh pen Jambyl oblystyq «Araı» gazetiniń bas redaktory Dáýlet Tólendi «Jańa jáne dástúrli medıa: yntymaqtastyqtyń zamanaýı modelderi» taqyrybynda oı tolǵady. Jambyl oblystyq «Aq jol» gazetiniń bas redaktory Kósemáli Sáttibaıuly memlekettik satyp alý, gazetke jazylý jáne basqa da máseleler boıynsha óz kózqarasyn ashyq aıtty. Sondaı-aq «Feık jańalyqtar ındýstrııasy: zardabymen kúresý joldary» taqyryby da qyzý talqylanyp, usynys-pikirler ortaǵa salyndy. Basqosýdyń aıasynda Qazaqstan Jýrnalıster odaǵynyń Jambyl, Qyzylorda, Túrkistan oblystyq, Shymkent qalalyq fılıaldary jáne «Medıakratııa» qoǵamdyq birlestigi arasynda birlesken memorandýmǵa qol qoıyldy.
