Túrkistanda jańa mektep ashyldy
TÚRKІSTAN. QazAqparat - Túrkistan qalasyndaǵy Otyrar móltek aýdanynda Ahmet Baıtursynov atyndaǵy №1-shi jalpy orta mektep paıdalanýǵa berildi, dep habarlaıdy Túrkistan oblysy ákiminiń baspasóz qyzmeti.
Baspasóz qyzmetiniń málimetterine qaraǵanda, jańa bilim nysanynyń ashylý saltanatyna Túrkistan oblysynyń ákimi Ómirzaq Shókeev qatysty.
Jańa jyl qarsańynda esigin aıqara ashqan bilim uıasy 900 orynǵa laıyqtalǵan.
Jınalǵan jurtty bilim mekemesiniń ashylýymen quttyqtaǵan aımaq basshysy, jańa mekteptiń ishin aralap kórdi. Zaman talabyna saı salynǵan ǵımaratta pándik kabınetter, májilis pen sport zaldary, ashana, medıtsınalyq bólme bar. Barlyǵy qajetti qural - jabdyqtarmen tolyq qamtylǵan. Qurylysy 2018 jyly bastalǵan úsh qabatty bilim uıasy kógildir otynmen jylytylady. Tolyǵymen ortalyqtandyrylǵan sý jáne káriz júıelerimen qamtamasyz etilgen.
Zamanaýı mekteptiń jalpy aýmaǵy 12 myń sharshy metr. Jalpy, Túrkistan oblysynda 905 (onyń – 6 jekemenshik) jalpy orta mektep jumys isteıdi, onda 481 myńnan astam oqýshy bilim alýda. Óskeleń urpaqty 60 myńǵa jýyq muǵalim sabaq berýde. Olardyń 18 paıyzy jas mamandar. Al, daryndy balalarǵa arnalǵan 12 mektep-ınternat qyzmet atqarýda. Atalǵan mekemelerde 3000-nan astam oqýshy bilim alady.
Arys, Báıdibek, Keles, Maqtaaral, Ordabasy, Otyrar, Saıram, Sozaq aýdandarynda daryndy balalarǵa arnalǵan mektepter qarastyrylmaǵan. Osyǵan baılanysty, bul aýdandardan daryndy balalarǵa arnalǵan mektepterdi 2020 jyly ashyp, jalpy kólemi 2000 oqýshyny qamtý josparlanýda. Sondaı-aq, oblys ortalyǵynan Abaı Qunanbaev atyndaǵy daryndy balalarǵa arnalǵan gýmanıtarlyq baǵyttaǵy mektepti ashý josparlanǵan.
