Túrkistanda jańa aýyzsý júıesi iske qosylady
TÚRKІSTAN. QazAqparat - Túrkistan qalasyndaǵy ákimshilik-iskerlik ortalyǵynda boı kóterip jatqan ǵımarattarǵa sapaly aýyzsý jetkizý maqsatynda zamanaýı sý qory júıesiniń qurylysy júrgizilýde, dep habarlaıdy QazAqparat.
«Ondaǵy barlyq qondyrǵylar otandyq ónimnen jasaqtalyp jatyr. Aımaq basshysy Ómirzaq Shókeev jańa sý júıesiniń qurylys jumystaryn baqylap, jaýapty mamandarǵa naqty tapsyrmalar júktedi. Jospar boıynsha jańa sý qubyrynyń qurylysy aldaǵy maýsym aıynda tolyǵymen iske qosylýy tıis», - dedi oblys ákimdiginen.
Túrkistan qalasynda júzege asyp jatqan birqatar áleýmettik mańyzy bar jobalardyń jumysyn qadaǵalaǵan oblys ákimi «Arys-Túrkistan» arnasynan bastaý alatyn ırrıgatsııalaq sý arnasynyń qurylys basynda boldy. Kanal sýynan shahardaǵy saıabaqtar men gúlzarlar, jol boıyn jaıqaltqan jasyl jelek pen egistik alqaptar sýarylady. Uzyndyǵy 3,6 shaqyrymǵa sozylǵan sý arnasy tolyǵymen betondalǵan. Aınalasyna aıaqjoldar men velojol tóselýde. Jaǵalaýyn jaryqtandyryp, oryndyqtar ornatý jumystary jalǵaspaq.
Aımaq basshysy sondaı-aq jańa «Túrkistan» ındýstrıaldy aımaǵynda ornalasqan ákimshilik-turmystyq kesheniniń ishki jáne syrtqy qurylys jumystaryn tekserdi. Ázirge qurylystyń 90 paıyzy oryndalǵan. Abattandyrylýy men árleý jumystary bir aı kóleminde aıaqtalady. Jalpy, ákimshilik-turmystyq kesheniniń birinshi qabatynda kórme ortalyǵy ashylmaq. Odan bólek, májilis zaly men «bir tereze» qaǵıdasymen jumys jasaıtyn ortalyq ornalasady. Aýlasynda salynǵan fýtbol alańy men tennıs korty da jaqyn arada paıdalýǵa berilmek.
Erekshe dızaında salynǵan jańa ortalyqta keńse, óndiristik alańmen qatar Braýnfıld, ıaǵnı, kásiporyndar ózderiniń qural-jabdyqtarymen kelip daıyn jumys oryndaryna jaıǵasa alatyn arnaıy alańdardyń qurylysy júrgizilýde. Álemdik tájirıbege saı jumys jaılary kásipkerlerge jeńildetilgen jaldaý aqysymen beriledi. Alǵashqy Braýnfıld naýryz aıynyń sońynda ashylady dep kútilýde. Ekinshi óndiristik ǵımarat sáýir aıynyń sońynda paıdalanýǵa berilmek. Jalpy, jyl sońyna deıin Túrkistan qalasynda budan bólek 5 Braýnfıld boı kóteredi.
