Túrkistanda Jambyl oblysynyń mádenı kúnderi ótip jatyr
TÚRKІSTAN. QazAqparat - Túrkistanǵa Jambyl oblysynan rýhanı-mádenı kerýen keldi, dep habarlaıdy QazAqparat tilshisi.
«Uly Jibek joly. Tarıh qoınaýynan – túrkiler besigine» atty Jambyl oblysynyń kerýenin Túrkistan oblysynyń ákimi Ómirzaq Shókeev pen túrkistandyqtar qushaq jaıa kútip aldy.
Kóshti bastap kelgen Jambyl oblysynyń ákimi Berdibek Saparbaev Túrkistan men Tarazdyń egiz qozydaı qalalar ekenin jetkizdi.
«Ǵasyrlardan-ǵasyrlarǵa jalǵasatyn tarıhy bar Túrkistan men Taraz qalalary elimizdiń damýyna úles qosyp keledi. Osydan 25 jyl buryn Elbasy Nursultan Ábishuly «meniń negizgi arman-maqsattarymnyń biri – osy Túrkistandy tek túrkilerdiń emes, musylman qaýymynyń rýhanı ortalyǵyna aınaldyrý» dep edi. Mine, 2-3 jyldyń ishinde Túrkistannyń qalaı túrlenip jatqanyna kýá bolyp júrsizder. Óńirdiń damýyna Prezıdentimiz Qasym-Jomart Kemelulynyń qoldaýy mol dep bilemiz. Túrkistan – maǵan jat emes. Osy jerde eńbek etkennen keıin shaharǵa júregim buryp turady, Túrkistan gúldense, qýanasyń. Sebebi qazaq eli úshin bul qalanyń orny bólek. Buǵan deıin Jambyl oblysy Túrkistanǵa bir nysandy tartý etken bolatyn. Biz búgin Túrkistannyń rýhanııatyna óz úlesimizdi qosaıyq, turǵyndary men qonaqtaryna kóńil-kúı syılaıyq dep arnaıy kerýenmen kelip otyrmyz», degen Berdibek Mashbekuly qalany túrlendirýde Ómirzaq Estaıulynyń uıymdastyrýshylyq sheberligi joǵary ekenin de atap ótti.
Óz kezeginde Túrkistan oblysynyń ákimi Ómirzaq Shókeev:
«Elbasy Nursultan Nazarbaev Túrkistandy damytamyn, halyqaralyq deńgeıde atyn shyǵaryp, tarıhı ádildikti ornatamyn dep júretin. Ol uly maqsat oryndalyp, búginde Túrkistan jańǵyrýdy bastan ótkerýde. Oǵan barlyq oblys, kúlli Qazaq eli úles qosyp jatyr. Minekı, búgin jańarǵan Túrkistanǵa kórshiles Jambyl oblysynan kerýen keldi. Buǵan óte qatty qýanyp turmyz. Berdibek Máshbekulymen Úkimette kezdeskenimizde Túrkistanǵa eń aldymen Jambyl oblysy baryp, mádenı kúnderin ótkizýi tıis ekenin aıtqan bolatyn. Sol bastama júzege asyp otyr. Ózi de Túrkistannyń 1500 jyldyǵyn ótkizýge aıryqsha úles qosqan azamat ekenin bilesizder. Jambyl oblysy syıǵa tartqan «Qabyldaý ortalyǵy» búginde týrısterge sapaly qyzmet kórsetip jatyr. Árıne, qurylys júrgiziledi, ǵımarattar salynady. Biraq onyń bárin mazmunǵa toltyrý kerek. Qazir pandemııa qolbaılaý bolyp tur, biraq eldiń rýhyn kóteretin is-sharalar jıi ótýi tıis. Búgin arnaıy kelgen jambyldyqtarǵa alǵysymyz mol», - dedi.
Túıe men jylqyly kerýenmen sán-saltanatymen kelgen jambyldyqtar mádenı kúnderge erekshe daıyndalǵan.
El Táýelsizdiginiń 30 jyldyǵyna jáne jyr alyby Jambyl Jabaevtyń 175 jyldyǵyna arnalǵan Jambyl oblysynyń Túrkistan oblysyndaǵy kúnderi mazmundy is-sharalarmen órnektelip jatyr.
Al Túrkistandaǵy etnoaýylda «Taraz – Uly dalanyń kóne shahary» atty jyljymaly kórme uıymdastyryldy.
Sonymen birge «Ótkeni – ónege, búgini – bekem, bolashaǵy – jarqyn Jambyl óńiri» atty jyljymaly mádenı is-sharasy men jambyldyq qolónershilerdiń kórmesi de túrkistandyqtarǵa rýhanı baılyq syılady.
Taraz qalasynyń tarıhynan syr shertilip, mádenıeti, tarıhı jádigerleri men tanymal tulǵalary ulyqtaldy.
Shaǵyn kontserttik baǵdarlama men jambyldyq aqyn-jazýshylardyń kitap kórmesi jurtshylyq nazaryna usynyldy.
Oblystyq «Jastar resýrstyq ortalyǵy» qyzmetkerlerimen is-tájirıbe almasý semınary ótkizildi.
Jambyldyq jáne túrkistandyq jastar uıymdarynyń kóshbasshylary erkin pikir almasyp, ózara is-qımyl jasaý jónindegi memorandýmǵa qol qoıdy.
Etnoaýyldaǵy rýhanı baılyqqa toly is-sharalardan keıin Berdibek Saparbaev pen Ómirzaq Shókeev jáne jambyldyq delegatsııa «Qabyldaý ortalyǵy» men «Farab» kitaphanasyn jáne «Kerýen saraı» týrıstik keshenin aralady.
Áýlıeatalyqtar Túrkistandaǵy jaǵymdy jańalyqtar men oń ózgeristerge joǵary baǵalaryn berdi.
Jambyl oblysynyń Túrkistan oblysyndaǵy kúnderi 13 qarashaǵa deıin jalǵasyn tabady.
