Túrkistanda zamanaýı «Gúlder» saıabaǵy ashyldy
TÚRKІSTAN. QazAqparat - Túrkistan qalasynda Esim han alańyna jańadan kórik bergen «Gúlder» saıabaǵy búgin resmı túrde ashyldy, dep habarlaıdy QazAqparat oblysy ákiminiń baspasóz qyzmetine silteme jasap.
Saltanatty sharaǵa oblys ákimi Ómirzaq Shókeev pen qala əkimi Rashıd Aıýpov, sondaı-aq, zııaly qaýym ókilderi kelip, gúlzarly orynnyń lentasyn qıdy.
«Elimizdiń jaýharyna aınalatyn Túrkistandaǵy árbir nysan biz úshin asa mańyzdy. Mundaı oryndardy jańǵyrtý arqyly, biz turǵyndarǵa jaılylyq pen yńǵaılylyq tanytýdy kózdeımiz. Endeshe, jańa saıabaq qutty bolsyn! Týystaryńyz, dos-jarandaryńyzben keremet kesh ótkizýdiń taptyrmas orny bolaryna kámil senimdimin», – dedi saıabaqtyń saltanatty ashylýyna qatysqan aımaq basshysy Ómirzaq Shókeev.
Aıta keteıik, atalǵan demalys ornyn salǵan merdiger «Túrkistan jaryq-tazalyq» JShS. Abattandyrý jumystaryna eki aıdyń kóleminde ýaqyt ketken. Demalys ornynda dıametri 35 metrlik sýburqaq, 10 úlken jáne 72 kishi jaryqshamdar, hobbıtter úıi, ortalyqtar, kógal jáne gúlder qoıylǵan. Aldaǵy kóktemde munda raýshan jáne basqa da san alýan túrli gúlder egiledi.
Túrkistanda saıabaqtar sany aldaǵy ýayqtta arta túsetin bolady. Olardyń barlyǵy bir-birin qaıtalamaıtyn ózindik ereksheligi bolmaq.
Jaqyn ýaqytta qurylys jumystary qarqyndy júrip jatqan Otyrar móltek aýdanyndaǵy ákimshilik-iskerlik ortalyqta jańa alań boı kótermek. Jyl sońyna deıin Túrkistan qalasyndaǵy «Jeńis» saıabaǵy men kishi alleıa qaıta jóndeý jumystarynan keıin paıdalanýǵa berilmek. Sonymen qatar, qalanyń shetki aýmaǵynda salynyp jatqan taǵy da segiz alleıanyń ashylýy kútilýde.
