Túrkistanda zaman talabyna saı salynǵan alyp sport kesheni ashyldy
TÚRKІSTAN. QazAqparat - Túrkistan qalasynda zaman talabyna saı salynǵan «Olympic Center» sport kesheni ashyldy, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Qýanyshty sátke Túrkistan oblysynyń ákimi Ómirzaq Shókeev, metsenat Danııar Abýlǵazın jáne jýyrda ǵana bokstan álem chempıony atanǵan Sáken Bıbosynov arnaıy qatysyp, ǵımarattyń lentasyn qıdy. Túrkistan oblysynyń ákimi Ómirzaq Shókeev sóz sóılep, Túrkistan jurtshylyǵyn quttyqtady.
– Oblysymyzda Táýelsizdigimizdiń 30 jyldyǵyn merekeleýge daıyndyq bastalyp ketti. Sol mereke qarsańynda Túrkistan qalasynda kóptegen áleýmettik nysandar iske qosylyp jatyr. Ózderińiz bilesizder, Elbasy Nursultan Nazarbaevtyń tapsyrmasymen Túrkistan qalasyn qaıta jańǵyrtý, jańartý jumystary júrip jatyr. 2,5 jyldyń ishinde 400-den astam nysan salyndy. Jańa ákimshilik-iskerlik ortalyq, tarıhı, mádenı, týrıstik ortalyqtar boı kóterdi. Túrkistannyń jańa kelbeti qalyptasyp kele jatyr. Mine, osy damý jospary aıasynda búgin óte keremet sport keshenin ashqaly turmyz. Bul nysandy belgili kásipker Danııar Abýlǵazın óz qarajatyna salyp, Túrkistanǵa tartý etip otyr. Ózderińiz kórip otyrsyzdar, munda sportty damytýǵa barlyq jaǵdaı jasalǵan. Sporttyń túr-túrimen jyldyń 4 mezgilinde de úzdiksiz aınalysýǵa bolady. Komandalyq oıyn túrleri zaly, 50 metrlik basseıni, medıtsına ortalyǵy óte jaqsy jobamen salynǵan. Bul keshen bizdiń jasóspirimder, jastar úshin óte keremet syılyq boldy. Minekı, aramyzda kúni keshe ǵana álem chempıony atanǵan Sáken Bıbosynov baýyrymyz kelip otyr. Óńirimizden Sáken sııaqty chempıondar shyǵa bersin!– dedi Ó.Shókeev.
Saltanatty is-sharada sport nysanyn salyp bergen metsenat Danııar Abýlǵazın jobany júzege asyrýǵa qoldaý kórsetken Túrkistan oblysy ákimdigine alǵysyn bildirdi.
– Bul keshendi Elbasy Nursultan Nazarbaevtyń tikeleı tapsyrmasymen salyp, elge tapsyryp otyrmyz. Ǵımaratta sporttyń san túrimen aınalysýǵa kóp múmkindikter jasalǵan. Óz ómirin kásibı sportpen baılanystyrǵysy keletinder de, densaýlyǵyn jaqsartyp, dene shynyqtyrýdy qalaıtyndar da ózine unaıtyn nárseni osy sport kesheninen tabatynyna senimdimin – dedi ol.
Jıynda bokstan Tokıo Olımpıadasynyń qola júldegeri, álem chempıony Sáken Bıbosynov ta quttyqtaý sóz sóılep, osy keshennen laıyqty izbasarlar ósip shyǵa bersin degen tilegin jetkizdi.
Túrkistandaǵy jańa turǵyn úıler aýmaǵynda ornalasqan nysannyń jalpy aýmaǵy – 13 246 sharshy metr. Munda sporttyń birneshe túrinen halyqaralyq dodalardy ótkizýge múmkindik bar. 1000 adam syıatyn ámbebap sport zalynda shaǵyn fýtbol, basketbol, gandbol, voleıbol, ústel tennısi jáne ózge de sport túrlerin damytýǵa múmkindik jasalǵan. 9 júzý jolaǵy bar, uzyndyǵy 50 metrlik basseın de halyq ıgiligine berildi. Ashyq aspan astyndaǵy basseınniń qasynda bir mezgilde 200 adam kúnge qyzdyrynyp, jarysty tamashalaı alady.
Sonymen birge erlerge jáne áıelderge arnalǵan jalpy 170 oryndyq kıim aýystyrý bólmesi, májilis zaly jáne sapaly ári kásibı qural-jabdyqtarmen jabdyqtalǵan jattyǵý zaly jumys isteıdi. Júgirý jolaqtary men velojol, massaj bólmesi, hamam, saýna jáne 40 oryndyq býfet bar. Taǵy bir ereksheligi, keshende medıtsınalyq ortalyǵy da jumys isteıtin bolady. Sondaı-aq 82 oryndyq qonaq úı salynǵan. Bul sport kesheninde oqý-jattyǵý jıyndaryn da ótkizýge bolady.
Qurylys jumystary 2019 jyly bastalyp, bıyl tapsyrylǵan bul nysan Túrkistan óńirinde buqaralyq jáne kásibı sportty damytýǵa tyń serpin beredi.
