Túrkistanda «WorldSkills TURKESTAN - 2019» oblystyq chempıonaty bastaldy
TÚRKІSTAN. QazAqparat - Túrkistan qalasynda «WorldSkills TURKESTAN - 2019» oblystyq chempıonaty bastaldy. Jumysshy mamandyǵynyń mártebesin arttyrý jáne dáripteý maqsatynda uıymdastyrylǵan sharaǵa 47 kolledjden 233 stýdent qatysýda, dep habarlaıdy QazAqparat tilshisi.
Chempıonat barysynda kolledj stýdentteri ınnovatsııalyq jáne shyǵarmashylyq jobalar kórmesin uıymdastyrdy. Oblystyq chempıonat tehnıkalyq, qurylys, aýyl sharýashylyǵy, týrızm, qyzmet kórsetý, kólik, bilim berý, densaýlyq saqtaý, tamaqtandyrýdy uıymdastyrý salalaryna qatysty 33 sala boıynsha ótkiziledi. Atalǵan baıqaýǵa qatysqan oblys ákiminiń orynbasary Málik Otarbaev qatysýshylarǵa sáttilik tiledi.
«Chempıonattyń basty maqsaty - jumysshy mamandyǵynyń mártebesin arttyrý jáne dáripteý, kásiptik bilim berýdegi tehnıkalyq, qyzmet kórsetý jáne qurylys salalary boıynsha qatysýshylardyń tájirıbelik daıyndyǵy, kásiptik biliktiligi, shyǵarmashylyǵy men joǵary eńbek mádenıeti, zamanaýı, onyń ishinde aqparattyq-kommýnıkatsııalyq tehnologııalardy is júzinde qoldana alý biliktiligin synaý. Bizdiń jastarymyz bos qııalmen ómir súrmeýi qajet, kerisinshe, tehnıkalyq mamandyqtardy ıgerip, el ekonomıkasyn kóterýge úles qosýlary qajet. Jastyq shaqta jalyndap, bilim alyp, túrli dodalarǵa túsip shyńdalǵan jón. Óıtkeni sizder - qoǵamnyń qozǵaýshy kúshisizder. Búgingi saıysta naǵyz bilimdiler jeńiske jetip, eldiń damýyna úles qosa bersin!», - dedi Málik Otarbaev.
Oblystyq chempıonattyń jeńimpazdary 25 sáýir kúni anyqtalatyn bolady. Tehnıkalyq jáne kásiptik bilim mekemeleri stýdentteriniń arasynda ótkiziletin jarystyń jeńimpazdaryna oblystyq bilim basqarmasynyń І, ІІ jáne ІІІ dárejeli dıplomdary men baǵaly syılyqtar tapsyrylady. Chempıonattyń І dárejeli dıplom ıegeri «WorldSkills KAZAKHSTAN - 2019» ulttyq chempıonatyna joldama alady.
Aıta keteıik, WorldSkills - álemniń 82 memleketine taralǵan halyqaralyq qozǵalys. Óńirimiz atalǵan chempıonatqa 2015 jyldan bastap qatysyp keledi. 2018 jyly Astana qalasynda ótkizilgen «WorldSkills Kazakhstan - 2018» Ulttyq chempıonatyna Túrkistan oblysynyń atynan 9 stýdent jiberilip, onyń 7-ýi júldeli oryndarǵa, ıaǵnı 2 altyn, 3 kúmis, 1 qola, 1 erekshe medalonǵa ıe boldy. Altyn medal ıegerleri aǵymdaǵy jyldyń tamyz aıyna josparlanyp otyrǵan «WORLDSKILLS KAZAN - 2019» Halyqaralyq chempıonatyna qatysady.
