Túrkistanda voleıboldan jasóspirimder arasyndaǵy respýblıkalyq týrnır bastaldy

Sporttyq shara KSRO men Qazaq KSR-na eńbek sińirgen jattyqtyrýshy, Voleıboldan qazaqtan shyqqan tuńǵysh KSRO-nyń sport sheberi Oktıabr Jarylqapovtyń júldesine arnaldy, dep habarlaıdy QazAqparat tilshisi.

Jarystyń saltanatty ashylý rásiminde oblystyq Sport jáne dene shynyqtyrý basqarmasynyń basshysy Polat Qyryqbaev pen qalalyq máslıhattyń depýtaty Muhammedáli Qorǵanbaev quttyqtaý sóz sóılep, sportshylarǵa sáttilik tiledi. O.Jarylqapov týraly estelikterimen bólisken shákirtteri men zamandastary da ómiri ónegege toly tulǵanyń sporttaǵy jetistigi úlgi bolarlyq dara jol ekenin atap ótti.

«Kelesi jyly jarystyń halyqaralyq deńgeıde ótkizilýi josparlanýda. Qazaq voleıbolynyń bolashaǵy jarqyn. O.Jarylqapovtyń shákirtteriniń arasynan eýropa jáne álem jeńimpazdary, eki Olımpıada chempıony shyqqan. Ol degenimiz úlken jetistik. Sondyqtan sport sańlaǵynyń voleıbolǵa qosqan eńbegi ólsheýsiz. Ańyz adamnyń esimin ulyqtaýǵa arnalǵan jarysty ótkizýdiń máni aıryqsha»,-dedi Túrkistan oblysynyń voleıboldan bas bapkeri Marat Bojbanbaev.

Respýblıkalyq týrnırge Aqtóbe, Qyzylorda, Almaty, Shyǵys Qazaqstan oblystary, Túrkistan, Kentaý qalalary men Saıram aýdanynan kelgen 100-den astam sportshylar qatysýda. Qazaq voleıbolynyń atasy atanǵan túrkistandyq sportshynyń dańqyn asqaqtatqan doda 24-qarashaǵa deıin jalǵaspaq.