Túrkistanda úzdik jas ánshi anyqtalady
TÚRKІSTAN. QazAqparat – Búgin Túrkistan qalasynda «Araı-2020» jas estrada ánshileri men mádenı is-shara júrgizýshileriniń baıqaýy bastaldy. Jas talanttardy anyqtaıtyn konkýrs bul joly Abaıdyń 175 jyldyq mereıtoıyna arnalyp otyr, dep habarlaıdy QazAqparat tilshisi.
Mádenı shara aqynnyń shyǵarmalaryn jastar arasynda keńinen nasıhattap, jas talant ıeleriniń ónerine qoldaý bildirý ıaqsatynda uıymdastyryldy.
Baıqaýdyń ashylý saltanatynda sóz alǵan Túrkistan oblystyq mádenıet basqarmasy basshysynyń ýaqytsha mindetin atqarýshy Asylhan Temirhan mundaı sharalardyń jas talanttardyń erte ári tez tanylyp, respýblıkalyq, halyqaralyq baıqaýlarǵa qatysýyna jol ashatynyn tilge tıek etti. Sondaı-aq, ol ádil qazy quramy men barsha qatysýshylarǵa sáttilik tiledi.
Aıta keteıik, qatysýshylar aldyn ala Túrkistan oblystyq mádenıet basqarmasymen bekitilgen baıqaý qaǵıdalaryna sáıkes 3-5 aqpan aralyǵynda óz aýdan-qalalarynda ótken irikteý kezeńinde jeńip shyqqan bolatyn. Onda 294 úmitker qatysyp, 38-i sońǵy kezeńge joldama alǵan. Búgin osy úmitkerler ózara kim myqtyny anyqtaıtyn bolady. Óner saıysynyń deńgeıin kóterip, ádil ótýin qamtamasyz etý maqsatynda qazylar alqasynyń quramyna tanymal ánshiler men akterler da shaqyrtyldy. Solardyń biri halyqaralyq jáne respýblıkalyq teatr festıvalderiniń júldegeri, «Daryn» memlekettik syılyǵynyń ıegeri, Astana jastar teatrynyń akteri Ádil Ahmetov pen oblystyq «Araı» jas án oryndaýshylar baıqaýynyń 1996 jylǵy gran-prı ıegeri, halyqaralyq «Azııa daýysy» festıvaliniń jeńimpazy, ánshi Baýyrjan Isaev bar.
«Meniń de ónerdegi alǵashqy qadamym osy festıvalden bastalǵan. Sondyqtan qazylar alqasyna múshe bolýdy usynǵanda erekshe tolqydym. Bir jaǵynan úlken jaýapkershilik júktelgenin sezindim. Mine, búgin osy baıqaýdyń ádil qazy alqasynyń múshesi retinde naǵyz talant ıesin anyqtaýǵa kelip otyrmyz. Qazaqta «Júzden júırik, myńnan tulpar» degen qanatty sóz bar. Sondyqtan barsha qatysýshy úmitkerlerge sáttilik serik bolsyn degim keledi», - dedi baıqaý aldyndaǵy baspasóz máslıhatynda sóz alǵan Baýyrjan Isaev.
Eske salaıyq, «Araı-2020» baıqaýy óńirde 1995 jyldan beri ótkizilip keledi. Búgin keshkisin onyń jeńimpazdary anyqtalyp, marapattaý rásimi gala-kontsertke ulaspaq.
