Túrkistanda «Úzdik pedagog 2020» baıqaýynyń jeńimpazdary marapattaldy
TÚRKІSTAN. QazAqparat - Túrkistan oblysynda «Ustazdar kúnine» oraı saltanatty jıyn ótip, respýblıkalyq «Úzdik pedagog 2020» baıqaýynyń jeńimpazdary marapattaldy. Qazaqstan Respýblıkasy Bilim jáne ǵylym mınıstri Ashat Aımaǵambetovtyń onlaın rejımdegi quttyqtaýymen bastalǵan sharada ustazdar erekshe qurmetke bólendi, dep habarlaıdy QazAqparat tilshisi.
Atalmysh sharaǵa oblys ákiminiń birinshi orynbasary Arman Jetpisbaev pen adamı áleýetti damytý basqarmasynyń basshysy Raqymbek Jolaev, óńirdiń eń úzdik ustazdary men osy salanyń ardagerleri qatysty. Jıynda óńir boıynsha eń úzdik dep tanylǵan úsh ustazǵa «Úzdik pedagog 2020» merekelik medali taǵylyp, QR Bilim jáne ǵylym mınıstrligi tarapynan berilgen 2 778 000 teńge aqshalaı syıaqy tabystaldy. Sharada sóz alǵan oblys ákiminiń birinshi orynbasary Arman Jetpisbaev búgingi kúni ustazdyń róli erekshe ekenin atap ótti.
«Bárimiz de ustazdyń qasıeti men qadiriniń arqasynda orasan zor jetistikterge jetip otyrmyz. Ótken jyly elimizde tuńǵysh ret «Pedagogtardyń mártebesi týraly» zań qabyldanyp, ustazdardyń qoǵamdaǵy rolin arttyrýǵa úlken serpin berdi. Tuńǵysh Prezıdentimiz ben Memleket basshysy da ustazdarǵa aıryqsha nazar aýdaryp, jaǵdaı jasalýyna yqpal etýde. Búgingideı mańyzy joǵary merekede árbirińizdiń eńbekterińizge jemis, januıalaryńyzǵa jaqsylyqtar tileımin», - dedi Arman Jetpisbaev.
Sonymen qatar, shara aıasynda Túrkistan oblysy ákiminiń «Oblysqa sińirgen eńbegi úshin» tósbelgisi, oblystyq maslıhattyń UBT-da respýblıka deńgeıinde joǵary kórsetkishke qol jetkizgen mektep basshylaryna «Alǵys haty», muǵalimder kúnine oraı Túrkistan oblysy ákiminiń «Qurmet gramotasy», respýblıka deńgeıinde «Úzdik ustaz» baıqaýynyń qatysýshylaryna oblys ákiminiń «Alǵys haty» tabystaldy. Sondaı-aq, «Úzdik synyp jetekshisi» baıqaýynyń jeńimpazdary anyqtaldy. Oqýshynyń tulǵalyq qasıetteriniń qalyptasýyna kómektesip, onyń qyzyǵýshylyǵy men beıimdiliginiń arta túsýine múmkindik týǵyzatyn baıqaýdyń ár aýdan-qaladan úzdik shyqqan 16 ustaz arnaıy dıplommen jáne aqshalaı syılyqpen marapattaldy. Merekelik shara barysynda oblystyq adamı áleýetti damytý basqarmasynyń basshysy Raqymbek Jolaev pen Leńgir qalasy №1 mektep-gımnazııasynyń dırektory Nazıra Tezekova, Saryaǵash aýdandyq bilim jáne ǵylym qyzmetkerleri kásipodaq komıtetiniń tóraǵasy Ákimbaı Tastanbekov «Bilim jáne ǵylym qyzmetkerleriniń kásipodaǵyna sińirgen eńbegi úshin» tósbelgisimen marapattaldy.
