Túrkistanda uıaly telefondar urlady degen kúdikpen erli-zaıyptylar ustaldy
ShYMKENT. QazAqparat - Túrkistanda uıaly telefondardy urlaýmen aınalysty degen kúdikpen erli-zaıyptylar ustaldy. Tergeý barysynda olardyń zańsyz áreketterin negizinen ortalyq bazarda júzege asyryp kelgendigi anyqtaldy. Bul týraly qalanyń prokýrory Rýslan Ábdiraıymov málimdedi, dep habarlaıdy QazAqparat tilshisi.
Qala prokýrorynyń sózinshe, 26 jastaǵy erli-zaıyptylardyń ózderiniń jymysqy áreketterin júzege asyrýda árqaısysynyń óziniń róli bolǵan.
«Kúni keshe Túrkistan QІІB-nyń qyzmetkerleri erli-zaıypty 26 jastaǵy eki azamatty quryqtady. Olar Túrkistan qalasy, Táýkexan kóshesiniń boıyndaǵy «Qýanysh» bazary, «Kerýen saraı» jáne «Altyn Orda» aýmaǵyndaǵy saýda oryndaryna baryp, urlyqpen aınalysqan degen málimet bar. belgili bolǵanyndaı, urylardyń biri turǵyndardyń nazaryn ózge jaqqa aýdaryp, aldap turǵanda, ekinshisi uıaly telefondardy jymqyryp, oqıǵa ornynan boı tasalap otyrǵan. Búgingi tańda erli-zaıyptylardyń 9 qylmysy anyqtaldy. Ustalǵandardyń 35 myńnan 100 myńnyń arasyndaǵy, barlyǵy 700 myń teńgege jýyq telefondy urlaǵany, sotqa deıingi tergep-tekserý qorytyndysymen bekitildi»,- deıdi Rýslan Áljanuly.
Qazirgi tańda erli-zaıyptylardyń ústinen Qylmystyq kodekstiń 188 baby, 2 bóligi boıynsha («Adamdar tobynyń aldyn ala sóz baılasýymen birneshe ret urlyq jasaý») is qozǵalyp, tergeý amaldary júrgizilýde. Eger sot otyrysy kezinde olardyń qylmysy dáleldense, bul bappen múlikteri tárkilenip, 5 jylǵa deıin bas bostandyǵynan aıyrylýy múmkin.
