Túrkistanda úshem bosanǵan eki ana perzenthanadan shyǵaryldy
TÚRKІSTAN. QazAqparat - Túrkistanda eki birdeı ana úshem bosanyp, búgin perzenthanadan shyǵaryldy. Bir aıdyń ishinde eki úshemniń ómirge kelýi oblys ortalyǵynda alǵash ret tirkelip otyr, dep habarlaıdy QazAqparat tilshisi.
Túrkistan oblystyq №3 perınataldyq ortalyqta bosanǵan Dınara Narhanova úsh uldy ómirge ákeldi. 1-shi mamyr kúni merziminen erte bosanǵan 27 jastaǵy kelinshektiń náresteleri 1 820 gr, 1800 gr, 1730 gr bolǵan. Dárigerler alǵashqy kezde sharanalardyń jaǵdaıy aýyr bolǵanyn aıtady. Olardy jasandy tynystaný apparatyna qosyp, bir aı kóleminde densaýlyqtaryna erekshe kútim jasaǵan. Qazir jaǵdaılary jaqsaryp, salmaqtary eki keliden asqan. Jasandy uryqtandyrý jolymen júkti bolǵan kelinshek balalarynyń esimin Ikram, Islam jáne Imran qoıypty. Buǵan deıin bir qyzy bar otbasynyń perzentteri osylaısha tórt balaǵa kóbeıdi.
Al, ekinshi úshemderdi bosanǵan Saıera Týklıeva 29 jasta. Birlik aýylynda turatyn kelinshek perzentterin 27 mamyr kúni bosanǵan. Kesar tiligi arqyly eki qyz ben bir uldy ómirge ákelgen jas ananyń úıinde taǵy úsh perzenti bar. Náresteleri de aıy kúnine tolyp, búgin óz úılerine jiberildi.
«Úshemderge júkti ekenimdi besinshi aptada bildim. Úı-ishimizben qýandyq. Bastapqy júktilik kezinde biraz qınalǵan kezderim boldy. Biraq erekshe kútim jasap, dárigerlerdiń aıtqanyn tyńdadym. Perzentterimdi aman-esen bosanyp aldym. Dárigerlerge alǵys aıtqym keledi, bizge jaqsy em-dom jasap, jaqsy qarady. Esimderin Fatıma, Ismaıl, Zýhra dep qoıdyq. Osylaısha ómirge úsh perzent ákelip, batyr ana atandym. Alla taǵalama osyndaı perzentter bergeni úshin rızamyn»,- deıdi Saıera Týklıeva.
Búgin qos ana men nárestelerine oblystyq ákimdiktiń atynan syı-syıapattar jasaldy. Ár nárestege arba men kerýetter, kıim-keshekter men oıynshyqtar tabystady. Óz kezeginde oblystyq Densaýlyq saqtaý basqarmasynyń basshysy Muqan Egizbaev sábılerdiń aldaǵy ýaqytta da erekshe kútimge alynatynyn aıtady.
«Qazirgi tańda nárestelerdiń barlyǵynyń jaǵdaıy jaqsy. Bastapqy kezde salmaqtary azdaý bolǵandyqtan, olardy dárigerler qaraýyna aldy. Medıtsınalyq kútim jasap, búgin úılerine jaqsy jaǵdaıda shyǵaryp jatyrmyz. Budan bylaı ár otbasyna medıbıke bólinetin bolady. Osy úshemderdiń jaǵdaıyn qarap, baqylaýda ustap otyratyn bolamyz»,-dedi Muqan Egizbaev.
Aıta keteıik, jyl basynan beri óńirde úsh úshem dúnıege kelgen. Eki ana Túrkistan qalasynda, taǵy bir ana Shymkent qalasyndaǵy oblystyq perınataldyq ortalyqta bosanǵan.
