Túrkistanda úsh jol apaty bolyp, eki adam qaza tapty
Bul týraly qalanyń prokýrory Rýslan Ábdiraıymov feısbýk áleýmettik jelisinde jarııa etti, dep habarlaıdy QazAqparat HAA tilshisi.
Rýslan Áljanulynyń aıtýynsha, jol-kólik oqıǵasyna kináli júrgizýshilerdiń biri paıǵambar jasynan asqan jaıaý júrginshini qaǵyp, qazaǵa ushyratqan. Qazir 22 jastaǵy júrgizýshi ýaqytsha tergeý abaqtysyna qamaldy. Al, ekinshi jol apaty boıynsha kóliktiń artqy dońǵalaǵy jarylyp, aýdarylyp ketken. Saldarynan ondaǵy júrgizýshiniń 58 jastaǵy anasy kóz jumdy. Prokýror tergeý barysynda bul júrgizýshige de bultartpaý sharasy qaralatynyn aıtady.
«Qurmetti júrgizýshiler! Kólikte jyldamdyqty saqtamaý, kóliktiń texnıkalyq jaǵdaıyna nemquraıly qaraý, ajalmen oınaǵanmen birdeı. Tek ózińizdiń ǵana emes, jaıaý júrginshiler men jolaýshylardyń ómirimen oınaý. Júrgizýshige jol erejesin saqtaý mindet sanalady. «Baıqamadym», «kózim baılandy», «ádeıi istegen joqpyn», «pálege urynyp qaldym» degen ýájder men taýsylmaıtyn syltaýlar, qamaýǵa almaýǵa ne bolmasa bosatyp jiberýge negiz bolmaıdy. Kináliler zańda kózdelgen qylmystyq jaýapqa tartylatyn bolady. Aldaǵy ýaqytta, jol-kólik oqıǵasyna túsken kóliktiń foto sýretterin, júrgizýshiler oılansyn degen maqsatta feısbýk áleýmettik jelisine salyp otyrý qajet pe, degen oıǵa keldim. Sońǵy eki kúnde qaıtys bolǵan ata-apalarymnyń ımanyn bersin, topyraǵy torqa bolsyn. Aǵaıyn-týysyna Alla sabyr bersin, qaıǵylaryńyzǵa ortaqpyz» dep jazady qala prokýrory óziniń paraqshasynda.
Aıta keteıik, jýyrda ǵana Túrkistan qalasyna jaqyn jerde jeńil kólik jolda turǵan júk mashınasyna soqtyǵysyp, saldarynan eki adam oqıǵa ornynda qaza tapqan edi. Keıinnen baqılyq bolǵandardyń Ońtústik Qazaqstan oblysy ákiminiń keńesshisi Seıit Ertaı men oblystyq máslıhattyń depýtaty Qamytbek Aıtóreev ekeni anyqtaldy. Al, jol apatynan aýyr dene jaraqatyn alyp, Túrkistan qalalyq aýrýxanasynyń jansaqtaý bólimine túsken júrgizýshi búgin palataǵa shyǵaryldy. Dárigerler onyń jaǵdaıy durystalyp kele jatqanyn aıtady.
