Túrkistanda usaq sharýashylyqtardy irilendirý máselesi talqylandy

Semınarǵa aýdan ákimi Nurlan Baıǵut pen aýyldyq okrýg, kent ákimderi, sharýa qojalyq tóraǵalary men mal sharýashylyǵymen aınalysýǵa nıet bildirgen aýdan turǵyndary qatysty. Jıynda sóz alǵan aýdan ákimi kásipkerlerge ettiń sapasy men túrli aýrýlardan qaýipsizdigin qamtamasyz etý maqsatynda arnaıy belgilengen mal soıý beketterinde soıý qajettigin eskertti. Basqosýda qatysýshylar usaq sharýashylyqtardan bastap iri mal bordaqylaý alańdaryn aralap, jumysyn óz kózderimen kórdi. Jıynda aýdandyq aýyl sharýashylyq bóliminiń basshysy men sharýa qojalyq tóraǵalary zákirlik joba retinde alynǵan «Adal» sharýa qojalyǵynyń aýmaǵynda semınarǵa qatysýshylarǵa mal bordaqylaýdyń qyr-syrymen bólisip, memlekettik baǵdarlamalar men qoldaýlardy keńinen túsindirdi. Qojalyqta «Sybaǵa» baǵdarlamasymen alynǵan buqashyqtardy 200 kg salmaqtan asqannan keıin bordaqylaýǵa ótkiziledi. Al, 400 kg jetkizgen jaǵdaıda eksportqa etke ótkiziledi. Bul óz kezeginde qarapaıym úlgidegi mal bordaqylaýmen aınalysyp otyrǵan kásipkerlerdiń kózqarasyn ózgertip, etti deldalsyz eksportqa shyǵarý joldaryn kórsetedi. Túpkilikti nátıjesi «Sybaǵa» baǵdarlamasy boıynsha alǵan sharýa qojalyqtar memleket tarapynan berilgen jeńildikke ıe bola alatyny týraly aıtyldy.

Aıta keteıik, oblys ákimi Ó.Shókeev óńirde aýyl sharýashylyǵyn damytý maqsatynda úsh basym baǵytty belgilep bergen bolatyn. Mal sharýashylyǵy kún sanap damyt kele jatqan Túlkibas aýdanynda et ónimin kórshiles elderge eksporttaý jumystary da qarqyn alyp keledi. Máselen, aýdandaǵy «Adal» sharýa qojalyǵynyń ózi aǵymdaǵy jyly Ózbekstan respýblıkasyna 1000 tonna etti eksporttaý boıynsha kelisim shartqa turǵan.